Səhiyyə Nazirliyi Milli Onkologiya Mərkəzi (MOM) və Azərbaycan Onkoloqlar Cəmiyyətinin birgə təşkilatçılığı ilə hibrid formatda keçirilən IV Beynəlxalq Uroonkologiya Simpoziumu öz işini davam etdirir.

Aztibb.az xəbər verir ki, simpoziumda Azərbaycanla yanaşı, Amerika Birləşmiş Ştatları, Türkiyə, Almaniya və Fransadan uroonkoloji xəstəliklər üzrə ixtisaslaşmış mütəxəssislər iştirak edir.

Tədbirin birinci bölməsində “MRT-nin prostat vəzi xərçənginin diaqnostikasında rolu”, “PSA və MRI-fusion biopsiyası”, “Yuxarı sidik yolları xərçənginin müalicəsinə müasir yanaşma”, “Yüksək risk qrup xəstələrdə radikal prostatektomiya”, “Oliqometastatik prostat vəzi xərçəngi” və “Metastatik prostat vəzi xərçəngində molekulyar diaqnostika və 177Lu/225Ac-PSMA ilə target müalicə” mövzularında məruzələr dinlənilib.  

Həmçinin “Laporaskopik radikal nefrektomiya: böyrək şişləri üçün qızıl standart”, “Genetik markerlərin böyrək xərçəngində proqnostik əhəmiyyəti”, “İnvaziv sidik kisəsi xərçənginə yanaşma: EAU Guidelines”, “Sidik kisəsinin xərçəngönü xəstəlikləri”, “İnsidental adrenal törəmələrə yanaşma” və “Laparoskopik adrenalektomiya: Biz bunu necə edirik?” mövzuları üzrə müazakirələr aparılıb.

Qeyd edək ki, simpozium Azərbaycan Respublikası Səhiyyə Nazirliyinin Elmi-Tibbi Şura tərəfindən akkreditasiyadan keçib və 5 kredit vahidi verilib.