İclasda YAP Nərimanov rayon təşkilatının sədri Samir Vəliyev və təşkilatın nümayəndələri, Milli Hematologiya və Transfuziologiya Mərkəzinin icraçı direktoru Valeh Hüseynov, MHTM Talassemiya bölməsinin (Talassemiya Mərkəzi) baş həkimi və təşkilatın YAP üzvləri olan əməkdaşları iştirak ediblər.

 

Ərazi ilk partiya təşkilatının sədri Valeh Hüseynov açılış nitqində gündəlikdə duran məsələlər barədə məlumat verib. Bildirib ki, hesabat-seçki yığıncağının gündəliyində əsasən iki məsələ - ərazi ilk partiya təşkilatının sədrinin partiyanın VII Qurultayından ötən müddət ərzində fəaliyyətinə dair hesabat məruzəsinin dinlənilməsi, sədr və sədr müavininin seçilməsi məsələləri müzakirə olunacaq.

 

Daha sonra təşkilat sədrinin geniş hesabat məruzəsi dinlənilib, ərazi partiya təşkilatının fəaliyyəti və gördüyü işlərdən bəhs edilib.

 

İclasda çıxış edən YAP Nərimanov rayon təşkilatının sədri Samir Vəliyev yığıncaq iştirakçılarına bu ilin mart ayının 5-də keçirilən partiyanın VII Qurultayından bəhs edərək yeni Nizamnamə və proqramın qəbul edilməsindən, eləcə də struktur dəyişiklikləri haqqında ətraflı məlumat verib. Bildirib ki, bu islahatlar partiyanın gələcək inkişafına əsaslı zəmin yaradır.

 

Yığıncaqda bir sıra təşkilatı məsələlərə baxılıb, partiya üzvlərinin yekdil qərarı ilə Valeh Hüseynov ərazi partiya təşkilatının sədri, Afaq Nəsibova isə sədr müavini seçiliblər.

 

Sonda ərazi partiya təşkilatına yeni seçilən sədr və sədr müavini çıxışlarında göstərilən etimadı yüksək qiymətləndirdiklərini və bu etimadı hər zaman doğruldacaqlarını bildiriblər.