Aztibb.az xəbər verir ki, nümayəndə heyətinə Azərbaycan Respublikası Dövlət Gömrük Komitəsi Tibbi Xidmət İdarəsinin Sanitar Karantin Xidmətinin epidemioloqu Natiq Zülfüqarov, Mərkəzi Gömrük Hospitalı rəisinin müalicə işləri üzrə müavini Bəxtiyar Musayev, İnfeksiya Nəzarəti Komissiyasının sədri Səttar Yaqubov və Sterilizasiya şöbəsinin məsul tibb bacısı Rühəngiz Həsənova daxil olub. Onlar Türkiyənin Antalya şəhərində Dezinfeksiya, Antiseptika, Sterilizasiya (DAST) təşkilatının təşkilatçılığı ilə hibrid formatında keçirilən XII Beynəlxalq Sterilizasiya və Dezinfeksiya konqresində iştirak ediblər.

 

Konqresdə müasir dünyanın COVID-19 pandemiyası ilə apardığı mübarizə dövründə infeksiyanın yayılmasının qarşısının alınması üçün tibb müəssisələrinin qarşısında duran problemlərdən, onların həlli yollarından, bu sahədəki dünya standarlarından bəhs edilib. Tədbirdə iştirak edən bir sıra ölkələrdən, o cümlədən Almaniya, Fransa, İtaliyadan qatılan yüksəkixtisaslı mütəxəssislər bu sahədə apardıqları maraqlı tədqiqatları ilə çıxış ediblər.

 

Mərkəzi Gömrük Hospitalının tibbi personalının təlimdə iştirak etməsinin əsas məqsədi Hospitalda sanitar-epidemik vəziyyətə nəzarətin gücləndirilməsi və xəstəxanadaxili infeksiya ilə mübarizənin daha effektiv aparılması üçün beynəlxalq təcrübədən yararlanmasıdır.

 

Eyni zamanda, Mərkəzi Gömrük Hospitalının nümayəndə heyəti aparıcı ölkələrin nümayəndələri və DAST təşkilatının rəhbərləri ilə görüşlər keçirib, qarşılıqlı əməkdaşlıq yolları barədə danışıqlar aparıb. Görüşdə Mərkəzi Gömrük Hospitalının DAST təşkilatının Sterilizasiya və Dezinfeksiya sahəsi üzrə sıx əməkdaşlıq edilməsi qərara alınıb.

 

Tədbirin sonunda iştirakçılara sertifikatlar təqdim olunub.