Ümummilli lider Heydər Əliyevin anım gününə həsr edilmiş "Pediatriyada aktual mövzular: müasir tibbi yeniliklərin təcrübədə tətbiqi" mövzusunda beynəlxalq elmi konqres öz işini davam etdirir.

 

Konqresin ikinci günündə Mərkəzi Gömrük Hospitalının rəisi Elman Məmmədov çıxış edərək ölkəmizdə prenatal və postnatal diaqnostika, neonatologiya, pediatriya və uşaq kardiologiyası kimi vacib əhəmiyyətli sahələrdə əldə edilən nailiyyətlərin Ulu Öndərin səhiyyə sahəsində atdığı qətiyyətli addımların uğurlu nəticəsi olduğunu bildirib. O, uşaq sağlamlığının qorunması istiqamətində həyata keçirilən tədbirlərin hazırda Prezident İlham Əliyev tərəfindən layiqincə davam etdirildiyini vurğulayıb.

 

E.Məmmədov çıxışının sonunda konqres iştirakçılarına uğurlar arzulayıb.

 

Daha sonra Azərbaycan Tibb Universitetinin II Uşaq xəstəlikləri kafedrasının müdiri, t.e.d., prof. Nailə Sultanovanın video-müraciəti dinlənilib.

 

N.Sultanova video-müraciətində konqresin uşaq sağlamlığının qorunması istiqamətində aktual mövzuları əhatə etdiyini deyib, bu qəbildən olan elmi tədbirlərin keçirilməsinin vacibliyini vurğulayıb.

 

Açılış hissəsindən sonra konqres Mərkəzi Gömrük Hospitalının Pediatriya və neonatologiya şöbəsinin rəisi, pediatr-neonatoloq-reanimatoloq Telman Aytayev və Ankara Universiteti Tibb fakültəsi Cebeci Xəstəxanasının baş həkimi, pediatr-reanimatoloq, prof. Tanıl Kəndirlinin moderatorluğu ilə “Revmatologiya” paneli üzrə davam etdirilib.

 

Günün ikinci yarısında konqres Mərkəzi Klinik Xəstəxananın Uşaq Mərkəzinin rəhbəri, pediatr-neonatoloq Dr. Sevda Əsədova və Çukurova Universiteti Tibb fakültəsinin pediatr-reanimatoloqu, prof. Dinçer Yıldızdaşın moderatorluğu ilə “COVID -19-a qarşı peyvəndlər”, daha sonra isə Mərkəzi Gömrük Hospitalının pediatr-neonatoloq-reanimatoloqu Təranə Göyüşova və İstanbul Universiteti Tibb Fakultəsinin dosenti, pediatr-neonatoloq Mehmet Yıldızın moderatorluğu ilə “Poliklinik qəbul” paneli ilə davam edib.

 

Ümumilikdə konqresin ikinci günündə 3 paneldə 10 məruzə dinlənilib. Tədbir sual-cavab sessiyaları və interaktiv müzakirələrlə davam etdirilib.

 

500-dən çox yerli və beynəlxalq mütəxəssisin onlayn şəkildə iştirak etdiyi tədbir, eyni zamanda Mərkəzi Gömrük Hospitalının rəsmi "Facebook" hesabı üzərindən də canlı yayımlanıb.

 

Qeyd edək ki, konqres Azərbaycan Respublikası Dövlət Gömrük Komitəsi Tibbi Xidmət İdarəsi Elmi-Təcrübi və Tədris Mərkəzinin, Mərkəzi Gömrük Hospitalının və Hospitalın rəsmi tərəfdaşı olan "Florence Nightingale" Xəstəxanalar Qrupunun birgə təşkilatçılığı ilə "Zoom" platforması üzərindən onlayn şəkildə keçirilir.