Səhiyyə Nazirliyinin İctimai Səhiyyə və İslahatlar Mərkəzinin (İSİM) təşkilatçılığı, Rusiyanın Səhiyyənin Təşkili və Tibbi İdarəetmə Elmi-Tədqiqat İnstitutunun iştirakı ilə “XXI əsrdə səhiyyədə informasiya texnologiyaları” mövzusunda beynəlxalq konfrans öz işinə başlayıb.

 

Tədbiri giriş sözü ilə İSİM-in direktoru Qəhrəman Haqverdiyev açaraq müasir dövrdə informasiya texnologiyalarının inkişafının səhiyyə sistemində yeniliyə və tibbin mürəkkəb məsələlərinin həllinə yol açdığını deyib. O, səhiyyədə informasiya texnologiyalarının tətbiqinin xüsusən COVID-19 pandemiyası dövründə artdığını söyləyərək, rəqəmsal inkişafın müasir dövrdə aktuallığı vurğulayıb. Q.Haqverdiyev konfransın işinə uğurlar arzulayıb.

 

Sonra Səhiyyə Nazirliyi Səhiyyənin İnformasiyalaşdırılması Mərkəzinin direktoru Cəbrayıl Əsədzadə çıxış edərək ölkəmizdə informasiya texnologiyalarının inkişafı və səhiyyədə tətbiqi təcrübəsi barədə məlumat verib.

 

“Microsoft”şirkətinin təmsilçiləri – texniki strategiya və innovasiyalar üzrə mütəxəssis Mariya Eremiya COVID-10 pandemiyası zamanı Serbiyanın səhiyyə sistemində həkimlərə dəstək olmaq üçün “qarışıq reallıq” (mixed reality) və HoloLens2 istifadəsinin uğurlu təcrübəsi, Mərkəzi və Şərqi Avropa səhiyyə sənayesi sektorunun direktoru Ruti Kaydar isə səhiyyədə süni intellekt barədə çıxış ediblər.

 

Konfransda Moskva şəhəri Səhiyyə Departamentinin Səhiyyənin Təşkili və Tibbi İdarəetmə Elmi-Tədqiqat İnstitutunun İnformasiyalaşdırma İdarəsinin rəhbəri Aleksey Baxayevin “Moskvada səhiyyənin inkişafında informasiya texnologiyaları”, Səhiyyənin Təşkili və Tibbi İdarəetmə Elmi-Tədqiqat İnstitutunun İctimai Sağlamlıq və Tibbi Profilaktika Mərkəzinin rəhbəri, sosiologiya elmləri doktoru, dosent Tatyana Kamenevanın “Təbabətdə və səhiyyənin təşkilində informasiya texnologiyaları” mövzusunda məruzələri dinlənilib.

 

Beynəlxalq tədbir öz işini bu gün panel iclasları ilə davam etdirəcək.

 

Qeyd edək ki, konfransda iştirak ödənişsizdir.