ATU-nun Tədris Terapevtik Klinikasının Tibbi Şurasının iclasında mühüm məsələlər müzakirə edilib  
03.12.2021 17:10
Bu gün Azərbaycan Tibb Universitetinin (ATU) Tədris Terapevtik Klinikasında Tibbi Şurasının növbəti yığıncağı keçirilib.
 
Yığıncağı giriş sözü ilə klinikanın direktoru, professor Surxay Musayev açaraq noyabr ayında stasionar və ambulator xəstə qəbulu barədə məlumat verib. 
 
O, klinikadaxili intizam məsələlərindən də danışaraq bildirib ki, ATU-nun kafedralarının bəzi həkimləri xəstələri əsasən çalışdıqları digər klinikalarda qəbul edirlər. Bu halların, eyni zamanda AR Əmək Məcəlləsinə də zidd olduğu vurğulanıb və məsələnin həlli istiqamətində kafedra və şöbə müdirlərinə tapşırıqlar verilib. Həmçinin bəzi orta və kiçik tibb personalının xəstələrlə davranışının qüsurlu olduğu diqqətə çatdırılıb.
 
Sonra prof. S.Musayev klinikaya gələn Beynəlxalq Akkreditasiya Komissiyasının üzvlərinin tədris işləri ilə maraqlanması, Koç Universiteti Hospitalı rəhbərlərindən ibarət nümayəndə heyətinin klinika ilə tanışlıqları barədə məlumat verib.
 
Bundan başqa, direktor 6-9 dekabr 2021-ci il tarixlərində TİKA “Türk Yoğun Bakım uzmanları” təşkilatı tərəfindən təşkil olunacaq onlayn toplantıdan danışıb, əməkdaşları sözügedən tədbirdə fəal iştirak etməyə çağırıb.
 
Daha sonra direktorun müalicə işləri üzrə müavini Fəridə Hacıyeva çıxış edərək noyabr və oktyabr aylarında xəstə qəbulunun müqayisəli təhlilini verib, bu işdə nisbi irəliləyişin olduğunu bildirib. Bununla yanaşı, klinikaya xəstə qəbulunun hələ də lazımi səviyyədə olmadığı iştirakçıların diqqətinə çatdırılıb.
 
 
Sonda klinikaya yeni təyin olunmuş aptek müdiri Arif Mustafayev əməkdaşlara təqdim edilib.