Azərbaycan Tibb Universitetinin (ATU) Tədris Cərrahiyyə Klinikasında həkim-cərrahlar və rezidentlər üçün seminar keçirilib.

 

Aztibb.az xəbər verir ki, seminarı giriş sözü ilə klinikanın direktor müavini, professor Davud Pənahov açaraq tədbirdə iştirak edən İsrailin “Graftin international” və “3R Med Ltd” şirkətlərinin nümayəndələrini – Nitzan Hardufu, Marina Kuzini, Ben İshak Solomonu iştirakçılara təqdim edib. Bildirib ki, bugünkü seminarda qonaqlar təmsil olunduqları şirkətlərin istehsal etdikləri məhsullar və cərrahi əməliyyatlar zamanı tətbiq edilən üsullar barədə ətraflı məlumat verəcəklər.

 

Daha sonra Nitzan Hardufu çıxış edərək “Graftin international"-ın tibb sahəsinə aid xüsusi məhsullar istehsal edən şirkət olduğunu bildirib. O, cərrahi əməliyyatlar zamanı tətbiq edilən məhsullar və üsullardan danışıb.

 

Qonaq gec sağalan və o cümlədən şəkərli diabet zamanı əmələ gələn xroniki yaraların müalicəsində istifadə olunan üsul - Actigraft barədə məlumat verib. Qeyd edib ki, bu üsulu gec sağalan xroniki yaralar, dərinin təzələnməsi, qeysəriyyə əməliyyatları və s. yaralarda tətbiq etmək olar: "Çox effektivdir, dəri zədələnmələri və çapıq zamanı heç bir iz qalmır".

 

N.Hardufu, həmçinin Actigraftın tətbiqi zamanı mərhələlərin ardıcıllığı barədə iştirakçıları məlumatlandırıb və belə bir üsulun Azərbaycanın həkim-cərrahları tərəfindən tətbiqinin uğuru və əhəmiyyətinə toxunub.

 

Seminar sual-cavab və işgüzar şəraitdə öz işini başa vurub.

 

Qeyd edək ki, seminarda ATU-nun Beynəlxalq əlaqələr üzrə prorektoru, dosent Orxan İsayev, Tədris Cərrahiyyə Klinikasının rezidentlər üzrə məsul şəxsi, assistent Namiq Xəlilov da iştirak ediblər.