Gənclərin reproduktiv sağlamlığının qorunmasına dair maarifləndirmə tədbiri keçirildi
25.11.2021 15:21
Səhiyyə Nazirliyi, Təhsil Nazirliyi, Ailə, Qadın və Uşaq Problemləri üzrə Dövlət Komitəsinin birgə əməkdaşlığı ilə təhsil müəssisələrində yeniyetmə və gənclərin sağlam həyat tərzi, reproduktiv sağlamlıq və ailə planlaşdırılmasına dair biliklərinin artırılması, təhlükəsiz cinsi davranış vərdişlərinin formalaşdırılması istiqamətində növbəti maarifləndirmə tədbiri keçirildi. 24 noyabr 2021-ci il tarixdə Azərbaycan Milli Konservatoriyasının nəzdində Sumqayıt Musiqi Kollecinin tələbələri üçün “Reproduktiv sağlamlıq və ailə planlaşdırılması” mövzusunda tədbir keçirildi.
 
Aztibb.az xəbər verir ki, Səhiyyə Nazirliyinin İctimai Səhiyyə və İslahatlar Mərkəzinin nümayəndəsi, həkim Zümrüd Kazımova geniş təqdimatla çıxış edərək, reproduktiv sağlamlığın əsas amillərindən, zərərli vərdişlərdən uzaq olmağın və fərdi gigiyena qaydalarına riayət etməyin vacibliyindən söz açdı. O, gənclərə ailə planlaşdırılması və müasir kontraseptiv üsullar barədə ətraflı məlumat verib, iştirakçıları maraqlandıran sualları cavablandırdı.
 
Ailə, Qadın və Uşaq Problemləri üzrə Dövlət Komitəsinin Ailə Problemləri şöbəsinin müdir müavini Kamila Əliyeva çıxış edərək, gənclərin həyatında reproduktiv sağlamlıqla bağlı yaşanan problemlərdən, erkən nikahların fəsadlarından bəhs etdi.
 
Yekunda iştirakçıları maraqlandıran suallar cavablandırıldı.