Mərkəzi Gömrük Hospitalında rezidentura təhsili alan rezidentlərlə görüş keçirilib.

 

Aztibb.az xəbər verir ki, tədbirdə Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini, t.ü.f.d. dosent İsmayıl Əfəndiyev, Mərkəzi Gömrük Hospitalının rəis müavini Rəna Qasımova, Tibbi Xidmət İdarəsi Elmi-Təcrübi və Tədris Mərkəzinin mütəxəssisləri və rezidentlər iştirak ediblər.

 

Əvvəlcə Dr. İsmayıl Əfəndiyev çıxış edərək Mərkəzi Gömrük Hospitalında rezidenturaya yeni qəbul olunmuş rezidentləri təbrik edib, onların yüksəkixtisaslı həkim kimi yetişməsi, elmi araşdırmalar aparması üçün yaradılan şəraitdən danışıb. Beynəlxalq mübadilə proqramlarında iştirak imkanları barədə məlumat verən rəis müavini tədris proqramının faydalı yerinə yetirilməsi və kuratorlarla münasibətlərin düzgün qurulması istiqamətində rezidentlərə məsləhətlər verib.

 

İsmayıl Əfəndiyev, həmçinin Mərkəzi Gömrük Hospitalında təhsil alan rezidentlərin öz sahələri üzrə xarici ölkələrdə və ölkədaxili konfranslarda, konqreslərdə, rotasiyalarda iştirak etmək üçün Tibbi Xidmət İdarəsi Elmi-Təcrübi və Tədris Mərkəzinin göstərəcəyi dəstəkdən də danışıb. O, rezidentlərə elmi konfranslarda fəal iştirak etmələrini, elmi işlərdə aktiv olmalarını tövsiyə edib. 

 

Daha sonra Mərkəzi Gömrük Hospitalının rəis müavini Rəna Qasımova çıxış edərək rezidentlərə xarici ölkə universitetlərində rotasiyalar üçün müraciət qaydalarını izah edib. O, Mərkəzi Gömrük Hospitalının Azərbaycan səhiyyəsində xüsusi yer tutduğunu bildirib və burada həyata keçirilən unikal əməliyyatlar barədə məlumat verib.

 

Tədbirin sonunda rezidentlərlə qarşılıqlı fikir mübadiləsi aparılıb, suallar cavablandırılıb.

 

Qeyd edək ki, Mərkəzi Gömrük Hospitalında 2018-ci ildən yaradılmış rezidentura təhsilinin əsas məqsədi gələcəkdə işinin peşəkarı, yüksək nəzəri və təcrübi biliklərə malik savadlı həkimlər yetişdirməkdir.