Bu gün ATU-nun Tədris Cərrahiyyə Klinikasında damar və ürək-damar cərrahları üçün seminar keçirilib.

 

Almaniyanın Mannheim Cərrahiyyə Klinikasının layihəsi olan seminarda tez-tez rastlaşdığımız kardioloji xəstəliklərə müasir tibbi yanaşmalar və kardiologiya sahəsində yeniliklər müzakirə olunub.

 

ATU-nun Tədris Cərrahiyyə Klinikasının direktoru, professor Surxay Hadıyev, klinikanın tədris və elmi məsələlər üzrə direktor müavini, professor Davud Pənahov, damar cərrahı, professor Məhəmməd Kərimov seminarda çıxış edərək kardiologiya sahəsində qazanılan uğurlardan, eləcə də mövcud problemlərdən söhbət açıblar. Bu mövzuda seminarın həm biliklərin artırılması və mübadiləsi, həm də praktikanın gücləndirilməsi baxımından önəmli olduğu diqqətə çatdırılıb.

 

Daha sonra seminarda Mannheim Universiteti Xəstəxanasının Damar cərrahiyyəsi şöbəsinin professoru Michale Keesenin “Torakal aorta cərrahiyyəsində yenilliklər”, Azərbaycan Ürək-Damar Cərrahiyyəsi Cəmiyyətinin prezidenti, professor Kamran Musayevin “Torakal aorta cərrahiyyəsində Azərbaycan təcrübəsi” mövzusunda məruzələri dinlənilib.

 

Eyni zamanda, Mannheim Universiteti Xəstəxanasının Damar cərrahiyyəsi şöbəsinin uzmanı, ATU-nun məzunu  Vüqar Yaqublu seminarda rezidentlərin iştirakı ilə praktiki cərrahi təhlil aparıb.

 

Seminarın işində kardiocərrahlar, kardioloqlar, rezidentlər və rezidentura şöbəsinin Tədris Cərrahiyyə Klinikası üzrə məsul şəxsi, assistent Namiq Xəlilov iştirak ediblər.