Əziz Əliyev adına Azərbaycan Dövlət Həkimləri Təkmilləşdirmə İnstitutu və Rusiya Həkimlərin Fasiləsiz Təhsili Tibb Akademiyası Respublika Diaqnostika Mərkəzinin bazasında Azərbaycanda ilk dəfə olaraq birgə keçirdikləri “Tibbi kosmetologiya” ixtisası üzrə altıaylıq hazırlıq kursu uğurla davam edir.

İnstitutun mətbuat xidmətindən verilən məlumata görə, kurs “Tibbi kosmetologiya” ixtisası üzrə fəaliyyət göstərən həkimlərin təhsil və peşə ehtiyaclarının ödənilməsi, bilik və təcrübi vərdişlərinin mənimsənilməsinin və müasir standartlara uyğunluğunun təmin olunması məqsədi daşıyır.

Kursda növbəti praktiki məşğələləri Bakıya ezam olunmuş Rusiya Plastik Rekonstruktiv və Estetik Cərrahlar Cəmiyyətinin üzvü, Rusiya Həkimlərin Fasiləsiz Təhsili Tibb Akademiyasının plastik və üz-çənə cərrahiyyəsi kafedrasının assistenti, tibb elmləri namizədi Svetlana Surovıx Respublika Diaqnostika Mərkəzində aparıb. Kurs müddətində qeyri-invaziv və invaziv, həmçinin aparat metodlarından istifadə edərək müalicə prosedurlarının aparılması bacarıqları öyrədilib.