Elm adamları bütün növ koronaviruslara qarşı qoruya biləcək tək bir peyvənd əldə etmək üçün illərdir axtarışdadır. Bu yaxınlarda aparılan bir araşdırma bu məqsədə bir addım daha yaxın olduğunu ortaya qoydu.

Aztibb.az xəbər verir ki, alimlər peyvənd və ya təbii olaraq koronavirusa qarşı immuniteti olan insanların digər oxşar koronaviruslara da qarşı immunitet qazandırdıqlarını aşkar ediblər. Hesab olunur ki, bu yeni tapıntılar "bütün növ koronavirusa qarşı tək peyvənd üçün əsas verir".

Koronaviruslar yuxarı tənəffüs yollarının xəstəliklərinə səbəb olan böyük bir virus ailəsidir. İndiyədək onlardan yeddisi insanlarda aşkar edilib.

Aşkar edilmiş koronaviruslardan dördü ciddi xəstəliyə səbəb olmur, üçü isə ciddi xəstəliklə yanaşı ölümə də səbəb olur. Bunlar SARS-CoV-1, MERS və SARS-CoV-2-dir.

20 ilə yaxındır ki, yuxarıda qeyd olunan üç virus epidemiyalara səbəb olur. Müxtəlif peyvəndlər COVID-19-un qarşısının alınmasında effektivliyini göstərərək, infeksiyaların və ölümlərin sayını əhəmiyyətli dərəcədə azaltmağa kömək edir. Bununla belə, bu vaksinlərin digər koronaviruslara qarşı da qoruyucu olub-olmadığı hələ məlum deyil.  

Yeni araşdırma ilə alimlər koronavirus ailəsi üçün tək peyvəndin olmasına və gələcək pandemiyaların qarşısının alınmasına bir addım daha yaxınlaşdıqlarını düşünürlər.