Aztibb.az xəbər verir ki, tədbiri giriş sözü ilə açan Mərkəzin direktoru Vəlixan Qarayev öncə Yeni Azərbaycan Partiyasının yaradılması, fəaliyyət dövrü və strateji hədəflərindən danışıb. O, YAP-ın Azərbaycan tarixinin son dərəcə ağır və keşməkeşli günlərində, ölkənin ciddi sınaqlara məruz qaldığı bir dövrdə Azərbaycan ziyalılarının təşəbbüsü və fəal iştirakı ilə yaradıldığını qeyd edib. Bildirib ki, xalqımızın dahi oğlu, böyük təcrübəyə malik ümummilli lider Heydər Əliyev o dövrdə blokada şəraitində olan Naxçıvanda partiyanın təsis konfransını keçirməyə nail olmuşdur.

 

YAP sədri qeyd edib ki, Ali Baş Komandan İlham Əliyevin rəhbərliyi ilə rəşadətli Azərbaycan Ordusu 44 gün ərzində işğal altında qalan torpaqlarımızı düşməndən azad etdi. Beləliklə, Azərbaycan öz ərazi bütövlüyünü bərpa etdi: "Ölkə başçısı İlham Əliyev bəzi ölkələr və onların media qurumlarının suallarına verdiyi təmkinli, soyuqqanlı cavablarla onları susdurmuş və Azərbaycanın bu mübarizədə haqlı olduğunu bir daha bütün dünyaya faktlarla sübut etmişdir".

 

Daha sonra Mərkəzin direktor müavini - baş həkimi Rəfahət Zairov çıxış edərək Yeni Azərbaycan Partiyasının fəaliyyətinin mühüm istiqamətlərindən biri olan seçkilərdə yaxından və fəal şəkildə iştirak etdiyini deyib. O, ötən illər ərzində Azərbaycanda keçirilmiş prezident, parlament və bələdiyyə seçkilərində Yeni Azərbaycan Partiyasının böyük uğurlarından söz açıb, bir xalq olaraq yekdilliklə ölkə əhalisinin böyük əksəriyyətinin hakim partiya ətrafında sıx birləşdiyini vurğulayıb.

 

Daha sonra Mərkəzin insan resursları şöbəsinin müdiri, Yap Şamaxı Rayon Təşkilatı Gənclər Birliyinin sədr müavini Simral Mahmudov çıxış edib. O, 2009-cu ildən hakim partiyanın üzvü olduğunu, həmçinin YAP Şamaxı Rayon Təşkilatı adından 2019-cu ilin 23 dekabrında keçirilən Bələdiyyə seçkilərində namizədliyini irəli sürdüyünü, nəticədə qaliblərdən biri olduğunu bildirib.