Azərbaycan Tibb Universitetinin (ATU) Tədris Terapevtik Klinikasında Ümumdünya Pnevmoniya ilə Mübarizə Gününə həsr olunmuş elmi-praktik konfrans keçirilib.

 

Aztibb.az xəbər verir ki, əvvəlcə ATU-nun Tədris Terapevtik Klinikasının direktoru, professor Surxay Musayev çıxış edərək tədbir iştirakçılarını ikinci Vətən Müharibəsində qazandığımız Zəfərin ildönümü münasibətilə təbrik edib, zəfərimizin əbədi olmasını arzulayıb. O, torpaqlarımızın azadlığı uğrunda canından keçən şəhidlərimizə Allahdan rəhmət diləyib. 

 

Professor S.Musayev Dünya Pnevmoniya Gününün önəmindən danşaraq bildirib ki, bu günün təsis olunmasında əsas məqsəd dünya ictimaiyyətinin diqqətini pnevmoniya xəstəliyinə yönəltməkdir. Bütün dünyada COVID-19 virusu yayıldıqdan sonra ağciyər xəstəlikləri, xüsusilə də pnevmoniya ilə bağlı məsələ daha da ciddiləşdiyindən, bu günün qeyd olunması çox əhəmiyyətlidir.

 

Daha sonra konfrans öz işinə müxtəlif aktual mövzuları əhatə edən mühazirələrlə davam edib.

 

Tədbirdə professor Əlizamin Sadıqovun “Hospitaldaxili və Ventilyator Assosiasiyalı Pnevmoniyalar: xəstə nəticələrini necə yaxşılaşdırmalı?”, Cavid Paşayevin “Ağır sepsis və septik şok, yeniliklər nədir?”, Gülizar Əliyevanın “Hospitalizə olunmuş Covid-19 xəstələrində ikincili bakterial pnevmoniyalar: Antibiotik tətbiqinin yeganə və düz ünvanı” və Emil Qasımovun “COVID-19 infeksiyaları zamanı kəskin respirator distress sindromu, müalicəyə müasir yanaşmalar” mövzusunda məruzələri dinlənilib.