5 noyabr 2021-ci il tarixində Mərkəzi Neftçilər Xəstəxanasında Zəfər gününə həsr olunmuş tədbir keçirilib. Tədbirdə Mərkəzi Neftçilər Xəstəxanasının (MNX) baş direktoru Musa Abbasov, baş direktorun müalicə işləri üzrə müavini Hüseyn Şahmalıyev, həmkarlar ittifaqinin sədri Faiq Əliyev, MNX baş direktorun müavini Fədai Əliyev iştirak ediblər.

 

Aztibb.az xəbər verir ki, öncə Azərbaycan Respublikasının Dövlət himni səsləndirilib, sonra Vətən müharibəsi şəhidlərinin xatirəsi bir dəqiqəlik sükutla yad edilib.

 

Tədbirdə MNX-ın baş direktoru Musa Abbasov Müzəffər Ali Baş Komandan İlham Əliyevin rəhbərliyi altında Azərbaycanın yeni tarixini - Qələbə tarixini yaşadığımızı, dünya hərb səlnaməsinə öz möhürünü vuran möhtəşəm qələbəmiz haqqında danışıb, 8 noyabr Zəfər Günü münasibəti ilə kollektivi təbrik edib. Bildirib ki, 44 günlük Vətən müharibəsinin qələbəsində xalqımızın bütün nümayəndələri ilə bərabər Mərkəzi Neftçilər Xəstəxanasının personalı da “Dəmir yumruğ"un bir zərrəcəyinə çevrilib:

 

"Döyüşlərin başladığı andan tibb heyətimiz təcili şəkildə Gəncəyə ezam olunaraq Abbas Səhhət adına Xəstəxananı hospitala çevirib. Döyüşlərin getdiyi müddətdə personalımız digər tibb müəssislərindən gələn ixtisaslı mütəxəssislərlə birgə yaralılara müxtəlif tibbi yardım göstəriblər. Yaralılar üzərində 800-ə yaxın əməliyyat icra edilib".