Azərbaycan Respublikası Elmi Tədqiqatların Əlaqələndirilməsi Şurasının Biologiya, aqrar və tibb elmləri üzrə problem şurasının onlayn formatda 11-ci iclası şuranın Tibb və Biologiya seksiyaları ilə birlikdə keçirilib.

İclası açan AMEA-nın vitse-prezidenti, Problem şurasının sədri, akademik İradə Hüseynova gündəlikdə duran məsələlər barədə şura iştirakçıları məlumatlandırıb.

Sonra Problem şurasının elmi katibi, biologiya elmləri doktoru, dosent Dilzarə Ağayeva dissertasiya mövzularının təsdiqi üçün 23 işin (tibb üzrə 6, botanika üzrə 3, zoologiya üzrə 7, fiziki-kimyəvi biologiya üzrə 7) müzakirəyə çıxarıldığını bildirib.

Dissertasiya mövzularının akademik İradə Hüseynovanın rəhbərliyi ilə keçirilən müzakirələrində həm problem şurasının, həm də seksiyaların üzvləri fəal iştirak ediblər.

İclasın gedişində qarşıya çıxan suallara aydınlıq gətirmək üçün iddiaçılar və müvafiq dissertasiya işlərinin elmi məsləhətçiləri və rəhbərləri onlayn formatda iclasa qoşulublar.

Tibb üzrə müzakirəyə çıxarılmış 1 mövzu istisna olmaqla, digər 22 mövzu müsbət qiymətləndirilərək (əksər mövzuların adında dəyişikliklər edilməklə) qəbul olunub.