TƏBİB-in təşkilatçılığı ilə "Yeni Klinika" Tibb Mərkəzinin akt zalında 8 noyabr - Zəfər Gününə həsr edilmiş tədbir keçirilib.

 

Aztibb.az xəbər verir ki, tədbirdə TƏBİB-in İdarə Heyətinin sədri vəzifəsini icra edən Vüqar Qurbanov, İcbari Tibbi Sığorta üzrə Dövlət Agentliyinin Strateji təhlil departamentinin rəhbəri Araz Nəsirov, TƏBİB-in struktur bölmə rəhbərləri, eləcə də "Yeni Klinika" Tibb Mərkəzinin direktor vəzifəsini icra edən Musa Abbasov, Vətən müharibəsində ön cəbhə xəstəxanalarında çalışan bir qrup tibb işçiləri iştirak ediblər.

 

Əvvəlcə torpaqlarımızın azadlığı uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.

 

Mərasimdə çıxış edən Vüqar Qurbanov ölkə Prezidenti, Müzəffər Ali Baş Komandan İlham Əliyev və rəşadətli Azərbaycan Ordusu tərəfindən 44 gün ərzində torpaqlarımızın işğaldan azad edilməsinin tarixi hadisə olduğunu bildirib. O, dövlət başçısı tərəfindən məqsədli şəkildə cəbhə xəttinə yaxın yerlərdə xəstəxanaların inşa edilməsinin, eyni zamanda həmin xəstəxanalarda çalışan ixtisaslı tibb işçilərinin qazanılmış zəfərdə müstəsna rolu olduğunu vurğulayıb, ölkəmizdə fəaliyyət göstərən tibb işçiləri ilə yanaşı, könüllü şəkildə xarici ölkələrdən gəlmiş azərbaycanlı həkim heyəti tərəfindən minlərlə əsgərə fasiləsiz tibbi xidmətin göstərildiyini qeyd edib.

 

Daha sonra Vətən müharibəsində könüllü xidmət göstərmiş Tibbi ərazi bölmələrinin koordinasiyası departamentinin koordinatoru, həkim-cərrah İmran Qurbanov həkim olaraq Vətən müharibəsində xidmət etdiyi üçün böyük qürur hissi keçirdiyini bildirib.

 

Tədbirdə ön cəbhədə xidmət etmiş bir qrup tibb işçisinə Təşəkkürnamələr təqdim olunub.

 

Məlumat üçün qeyd edək ki, Vətən müharibəsində iştirak etmiş digər tibb işçiləri də mərhələli şəkildə təltif ediləcəkdir.