Milli Məclisin Səhiyyə komitəsinin sədri, akademik Əhliman Əmiraslanov UNİCEF-in Azərbaycan nümayəndəliyinin yeni rəhbəri Aleks Haykensi ilə görüşüb.
Görüşdə Əhliman Əmiraslanov ötən illər ərzində Azərbaycanın UNİCEF ilə birgə əməkdaşlığı sahəsində əldə olunan nailiyyətlərdən danışıb, bu əməkdaşlığın bundan sonra da uğurla davam edəcəyinə əminliyini bildirib.
UNİCEF-in Azərbaycan nümayəndəliyinin rəhbəri A.Haykens isə öz növbəsində, Azərbaycan hökuməti və UNİCEF-in birgə fəaliyyəti nəticəsində həyata keçirilmiş layihələrin əhəmiyyətini qeyd edib. O, görülən işləri yüksək qiymətləndirib və UNİCEF-in Azərbaycan nümayəndəliyi olaraq səhiyyə qanunvericiliyinin təkmilləşdirilməsi istiqamətində hər zaman Azərbaycan Parlamenti, xüsusilə də Səhiyyə komitəsi ilə əməkdaşlığa hazır olduğunu bildirib.
Görüşdə UNİCEF-in Azərbaycandakı fəaliyyətinin əsas prioritet sahələri olan yeni doğulan körpələrin ana südü ilə qidalanması və məktəbəqədər təhsil müəssisələrində uşaqların keyfiyyətli qidalanması problemləri ətrafında fikir mübadiləsi aparılıb, adıçəkilən istiqamətlərdə birgə layihələr çərçivəsində gələcək fəaliyyət istiqamətləri müzakirə olunub.