İnsultun kifayət qədər ağır və kompleksləşdirilmiş müalicə tədbirləri tələb edən qeyri-infeksion xəstəliklərdən biri olduğunu deyən E.Məmmədov insult keçirmiş xəstələrdə diaqnostikadan reabilitasiyaya qədər bütün mərhələlərdə ixtisaslaşdırılmış tibbi yardımın göstərilməsinin əhəmiyyətini qeyd edib. Konfransın elmi proqramının ikinci gününün diaqnostika və fizioterapiya məsələlərini əhatə etdiyini söyləyən E.Məmmədov bütün məruzəçilərə, panel rəhbərlərinə və dinləyicilərə uğurlar arzu edib.

 

Daha sonra konfransın elmi hissəsi günün birinci yarısında Respublika Müalicəvi Diaqnostika Mərkəzinin intervension-radioloqu Dr. Ağakişi Yəhyayevin moderatorluğu ilə “İnsultlu xəstələrə reanimasion yanaşma və kəskin beynin qanaxmaları” paneli, günün ikinci yarısında isə Mərkəzi Gömrük Hospitalının fizioterapevt-reabilitoloqu Dr. Səidə Kərimovanın moderatorluğu ilə “İnsult mərkəzi və reabilitasiya” paneli ilə öz işini davam etdirib.

 

Tədbirdə “İnsultun diaqnostikası”, “İnsult keçirmiş xəstələrin reanimasion təqibi”, “İnsult Mərkəzinin yaradılması strategiyası”, “İnsultda reabilitasiya prinsipləri”, “Neyroproteksiyanın əhəmiyyəti” və digər mövzularda məruzələr dinlənilib, geniş müzakirələr aparılıb.

 

Onlayn formada həyata keçirilən konfrans Mərkəzi Gömrük Hospitalının rəsmi "Facebook" səhifəsi üzərindən də canlı yayımlanıb.

 

Qeyd edək ki, tədbir Azərbaycan Respublikası Səhiyyə Nazirliyinin "Davamlı Tibbi Təhsil üzrə elm və tədris tədbirlərinin akkreditasiya Qaydaları" əsasında akkreditasiya olunaraq 12 DTT balı qazanıb.