TƏBİB-in məsul şəxsləri ilə Beynəlxalq Qızıl Xaç Komitəsinin (BQXK) xəstəxanaya qədər tibbi xidmətlər üzrə mütəxəssisi Emely Ragus, səhiyyə üzrə koordinator Nasrullah Dar və qurumun nümayəndələri arasında görüş keçirilib.

 

Görüş zamanı TƏBİB-in Tibbi xidmətlər departamentinin rəhbəri Firəngiz Əliyeva, Davamlı tibbi təhsil və tibbi təlimlər şöbəsinin müdiri Emil İskəndərov qurumun bölgələrdə fəaliyyət göstərən 13 təlim mərkəzində bugünədək təşkil edilmiş 144 təlimdə 2200 tibb işçisinin iştirak etdiyi barədə məlumat verib.

 

Çıxış edən BQXK-nın məsul şəxsləri son 2 həftə ərzində Gəncə, Şəmkir, Yevlax, Qazax və İmişlinin təcili tibbi yardım stansiyalarına edilmiş səfərlər zamanı stansiyalarda göstərilən xəstəxanaya qədər tibbi xidmətin təşkili barədə aparılan qiymətləndirmənin nəticələrindən danışıb, bu barədə geniş məruzənin hazırlanacağını bildiriblər.

 

Sonda tibb işçilərinin biliklərinin daimi inkişaf etdirilməsi məqsədilə qarşılıqlı fəaliyyət perspektivləri ətrafında müzakirələr aparılıb.