Azərbaycan Tibb Universitetinin (ATU) rektoru, professor Gəray Gəraybəyli Böyük Britaniyanın ölkəmizdəki səfirliyinin Ticarət və investisiyalar üzrə icraçı direktoru Laura Morrisonu qəbul edib.

 

Aztibb.az xəbər verir ki, görüşdə professor Gəray Gəraybəyli bir əsrə yaxın yaşı olan Tibb Universitetinin fəaliyyət istiqamətləri barədə qonağa məlumat verib. Rektor bildirib ki, bu müəssisə hazırda zəngin maddi-texniki bazası, tədris korpusları, tələbə yataqxanası, klinika və laboratoriyaları ilə Azərbaycanın ən böyük elm və tibb ocağıdır: “Universitetimizə hər il 1000-ə yaxın tələbə qəbul olur. ATU-nun nəzdində fəaliyyət göstərən 4 böyük klinikanın hesabına tələbələrimiz rahatlıqla klinik fənlərini burada mənimsəyə bilirlər. Universitetdə 6 fakültə fəaliyyət göstərir ki, bunlardan biri də Ulu Öndər Heydər Əliyevin təşəbbüsü ilə yaradılan hərbi tibb fakültəsidir".

 

Rektor G.Gəraybəyli ATU-nun fəaliyyətində beynəlxalq əlaqələrin genişləndirilməsinin prioritet istiqamətlərdən olduğunu vurğulayıb. Qeyd edib ki, hazırda universitetdə 39 ölkədən 2000-dən çox əcnəbi tələbə təhsil alır. İkili diplomun tətbiqi üçün bir sıra işlər aparılır, həmçinin tədris proqramına dəyişikliklər edilir.

 

İcraçı direktor Laura Morrison isə çıxışında iki ölkənin ali təhsil müəssisələri arasındaki əlaqələrin genişlənməsinin vacibliyindən danışıb, bu istiqamətdə görülə biləcək işlərdən söz açıb.

 

Görüşdə ATU-nun Beynəlxalq əlaqələr üzrə prorektoru, dosent Orxan İsayev, Mətbuat xidmətinin rəhbəri Günel Aslanova və Britaniyanın Azərbaycandakı səfirliyinin Ticarət məmuru Şəms Süleymanova da iştirak edirdilər.