Milli Hematologiya və Transfuziologiya Mərkəzinin və Hemofiliyalı Xəstələrin Respublika Assosiasiyasının birgə təşkilatçılığı ilə "Qanın laxtalanma pozğunluluğunun müasir müalicəsi və pasiyent hüquqları" mövzusunda hematoloqlar üçün seminar keçirilib.
Aztibb.az xəbər verir ki, seminar çərçivəsində Mir Qasımov adına Respublika Klinik Xəstəxanasının Hematologiya şöbəsinin müdiri Naidə Hüseynzadə "İnhibitorlu xəstələrə yanaşma və müasir müalicə metodları" mövzusunda məruzə ilə çıxış edib.
Naidə Hüseynzadə hemofiliyanın Azərbaycanda vəziyyəti, xəstəliyin inhibitor formasının müalicəsi və dünyada aparılan müasir müalicə üsulları barədə ətraflı məlumat verib. O, ağır formalı inhibitorlu pasiyentlərın həyat keyfiyyətinin yaxşılaşdırılmasında tətbiq edilən yeni nəsil müalicə üsulu olan Hemlibra (Emicizumab) dərman preparatının müalicədə tətbiqinin vacibliyini xüsusi vurğulayıb.
Daha sonra Hemofiliyalı Xəstələrin Respublika Assosiasiyasının sədri Ayaz Hüseynov "Pasiyentin keyfiyyətli müalicəsi və seçim hüququ" mövzusunda təqdimatla çıxış edib. Məruzəçi 2021- ci il 27 yanvar tarixdə təşkil edilən Pasiyent Təşkilatlarının I Respublika Forumunda qəbul olunan pasiyent hüquqlarına dair Bəyannamənin maddələrindən danışıb.
Ayaz Hüseynov pasiyentin müalicəsində tətbiq edilən üsulların, dərman preparatlarının seçimində xəstənin iştirakının vacibliyini qeyd edib. Həmçinin Milli Hematologiya və Transfuziologiya Mərkəzinin fəaliyyətinə toxunub. O, Milli Hematologiya və Transfuziologiya Mərkəzi ilə Hemofiliyalı Xəstələrin Respublika Assosiasiyasının birgə əməkdaşlığından məmnunluğunu ifadə edib.
Sonda məruzələr ətrafında müzakirələr aparılıb, suallar cavablandırılıb.
