Muxtar respublikada yeniyetmələr arasında vərəmin profilaktikasını və vaxtında aşkar edilməsini təmin etmək məqsədilə 9-11-ci sinif şagirdlərinin profilaktik flüoroqrafik müayinələrinə start verilib.

Tədbirin mütəşəkkilliyinin təmin edilməsi üçün əvvəlcə şəhər və kənd məktəblərində müayinələrə cəlb olunacaq uşaqların siyahıları tərtib olunub.

Müayinələrə ilk olaraq Kəngərli rayonundan başlanılıb. Rayonda keçirilən 9-11-ci sinif şagirdlərinin profilaktik flüoroqrafik müayinələrinə Qıvraq qəsəbəsində 147, Şahtaxtı kəndində isə 129 şagird cəlb edilib, onlarda xəstəlik halları aşkar edilməyib.

Naxçıvan Muxtar Respublikası Ağciyər Xəstəlikləri Dispanseri tərəfindən profilaktik flüoroqrafik müayinələr indiyədək 3 kənd, 2 şəhər məktəbini əhatə edib. Kəngərli rayonunun Xok, Böyükdüz və Qarabağlar kəndlərində və Naxçıvan şəhərinin 5 və 14 nömrəli məktəblərində indiyədək 469 şagird flüoqrafiya müayinəsindən keçirilib. 2 şagird xəstəliyə şübhəli bilinərək dispanserə dəvət edilib. Kəngərli rayonundan start verilən müayinələr noyabrın sonunadək davam edəcək.