TƏBİB-in İdarə Heyətinin sədri vəzifəsini icra edən Vüqar Qurbanov Acıbadem Səhiyyə Qrupunun Tibb Bacıları Xidmətinin direktoru Saliha Koç Aslanı və qurumun məsul şəxslərini qəbul edib.

 

Aztibb.az xəbər verir ki, görüşdə Vüqar Qurbanov Azərbaycan və Türkiyə Respublikaları arasında bütün istiqamətlərdə olduğu kimi, səhiyyə sahəsində də mühüm işlərin görüldüyünü bildirib. O, vətəndaşlarımızın keyfiyyətli səhiyyə xidmətinə əlçatanlığının təmin edilməsi istiqamətində tətbiq olunan icbari tibbi sığortanın mühüm rolunu diqqətə çatdırıb. Vüqar Qurbanov son illərdə ölkə başçısının rəhbərliyi ilə Azərbaycanda müasir standartlara cavab verən xəstəxanaların inşa edilərək istifadəyə verildiyini də vurğulayıb.

 

Sonra Saliha Koç Aslan çıxış edərək “Acıbadem Sağlamlıq Xidmətləri və Ticarət A.Ş.”nin fəaliyyət istiqamətləri, COVID-19 pandemiyası zamanı göstərdiyi xidmətlər və peyvəndləmə barədə ətraflı məlumat verib.

 

Görüş Türkiyə və Azərbaycanda COVID-19-la mübarizə tədbirləri, pandemiya ilə bağlı mövcud vəziyyət, vaksinasiyanın gedişatı, tibb işçilərinin bilik və bacarıqlarının təkmilləşdirilməsi istiqamətində qarşılıqlı əməkdaşlıq perspektivlərinin müzakirəsi ilə davam etdirilib.