Birləşmiş Ərəb Əmirliklərinin (BƏƏ) City University College of Ajman-da Ağız və üz-çənə cərrahiyyəsi kafedrasının assistenti, ağız və üz-çənə cərrahiyyəsi üzrə mütəxəssis, assistant professor, tibb üzrə fəlsəfə doktoru Sabrin Ali Azim tibb sahəsindəki xidmətlərinə görə BƏƏ-nin 10 illik qızıl vizası ilə təltif olunub.
Bu barədə Aztibb.az-a Sabrin Ali Azim açıqlama verib.
Azərbaycan Tibb Universitetinin məzunu olmaqla hər zaman fəxr etdiyini deyən S. Ali Azim qızıl vizaya BƏƏ dövlət başçısının bu ölkədə fəaliyyət göstərən və xüsusi istedadı ilə seçilən insanlara 10 illik qızıl vizanın verilməsinə dair qərarına əsasən layiq görüldüyünü vurğulayıb.
"BƏƏ rəhbərliyinə bu ölkədə fəaliyyət göstərən insanlara öz üzərlərində çalışmağa geniş imkan yaratdıqları üçün təşəkkürümü bildirirəm", - deyə S.Ali Azim bildirib.
Qeyd edək ki, S. Ali Azim 2016-cı ildən BƏƏ-də ağız və üz-çənə cərrahiyyəsi üzrə mütəxəssis kimi fəaliyyət göstərir. Bu müddət ərzində Azərbaycan və BƏƏ ali məktəbləri arasında tibb və təlim sektorunda təcrübə mübadiləsini nəzərdə tutan müqavilələrin bağlanması təşəbbüsü ilə çıxış edib.
