TƏBİB-in İdarə Heyətinin sədri vəzifəsini icra edən Vüqar Qurbanov ÜST-ün Azərbaycan nümayəndəliyin təmsilçisi, PROACT-Care layihəsinin rəhbəri İbrahim Durak və qurumun məsul şəxslərini qəbul edib.

 

Aztibb.az xəbər verir ki, görüşdə Vüqar Qurbanov istər COVID-19-la mübarizə tədbirləri, istərsə də ölkəmizdə səhiyyə yönümlü işlərin həyata keçirilməsində ÜST-ün rolunun vacibliyindən bəhs edib. O, Şamaxı rayonunda icra olunan PROACT-Care layihəsinin bölgələrdə səhiyyə xidmətinin əlçatanlığı baxımında mühüm əhəmiyyətə malik olduğunu bildirib.

 

Daha sonra çıxış edən İbrahim Durak layihə çərçivəsində Şamaxıda ilkin səhiyyə xidmətinin səviyyəsinin qiymətləndirilməsi ilə bağlı əhali arasında bir həftə ərzində həyata keçirilən təhlil, onun nəticələri və növbəti mərhələlərdə bu sahədə atılacaq addımlar barədə geniş məlumat verib.

 

Sonda tibb işçilərinin biliklərinin artırılması və qarşılıqlı təcrübə mübadiləsinin aparılması istiqamətində müzakirələrin aparılması baxımından bu kimi görüşlərin müntəzəm olaraq keçirilməsi barədə razılıq əldə edilib.