“Universitetin akkreditasiyası təhsilin ən vacib cəhətlərindən biridir və əsas vəzifəsi təhsilin yüksək keyfiyyətini təmin etməkdir. Akkreditasiya universitetin fəaliyyətinə verilən qiymətlə yanaşı, həm də onun gələcək inkişafı üçün zəmin təşkil edir”.

 

Aztibb.az xəbər verir ki, bu fikirləri ATU-nun Təlim-tərbiyə işləri üzrə prorektor dosent Zülfüqar Musabəyov "Ali təhsil səviyyəsinin təminatı: dünya tendensiyaları və regional aspektlər" mövzusunda 5-ci Mərkəzi Asiya Beynəlxalq Forumunun onlayn tədbirində iştirakı zamanı bildirib. Prorektor Z.Musabəyov onlayn toplantıda “Azərbaycan Tibb Universitetinin tədrisində dünya tendensiyalarının regional aspektləri” mövzusunda çıxış edib. Qeyd edib ki, müasir dünyada iş axtaranların bitirdiyi universitetin reytinqi, nüfuzu və rəqabətə davamlılığı xüsusi önəm kəsb edir: “Ali məktəbin tanınmasında isə beynəlxalq akkreditasiya mühüm rol oynayır. Bu proseduru ali məktəblərin öz proqramlarını təkmilləşdirməsi üçün adekvat qiymətləndirmə kimi hesab etmək olar. Beynəlxalq akkreditasiya könüllü olsa da, dünya bazarında mövqelərini möhkəmlətməyə, öz işinə kənardan baxmağa imkan yaradır”.

 

ATU-nun prorektoru Z.Musabəyov forum iştirakçılarına universitetin tarixi, fəaliyyəti, strukturu və idarəetmə qaydaları haqqında məlumat verib. Həmçinin, Azərbaycanda qəbul imtahanları, ATU-ya qəbul qaydaları, xarici tələbələrin qəbul prosedurundakı yeniliklər və digər maraqlı məqamları da onların diqqətinə çatdırıb. Bidlirib ki, ATU-da təhsil bakalavriat, magistratura, rezidentura və doktorantura səviyyəsində aparılır. Üç dildə təhsil verən Tibb Universitetində hazırda 7 minə yaxın tələbə təhsil alır ki, onlardan da 2200-dən çoxu xaricilərdir. Z.Musabəyov ATU-nun nəzdində fəaliyyət göstərən klinikalar, kitabxana və oxu zalları, tələbələr üçün yataqxanalar və s. haqqında da danışıb. Prorektor çıxışında universitetin beynəlxalq əlaqələrinə xüsusi yer ayırıb:

 

“Universitetimiz Azərbaycandakı xarici diplomatik nümayəndəliklərlə əlaqələr qurmaq və inkişaf etdirmək siyasəti yürüdür. ATU tibb təhsili sahəsində aparıcı universitet və təhsil müəssisələri ilə həm ikitərəfli, həm də çoxtərəfli müqavilələr bağlayır, beynəlxalq konfranslar, simpoziumlar və seminarlar təşkil edir. Son üç ildə biz 35 beynəlxalq saziş imzalamışıq. Tərəfdaşlarımız arasında Türkiyə, Rusiya, Portuqaliya, Moldova, Almaniya, Çin, İsrail, Ukrayna, Qazaxıstan və Belarusdan digər ölkələrdən olan aparıcı tibb məktəbləri, klinikaları, laboratoriyalar, elmi araşdırma mərkəzləri var”.

 

ATU-nun Təlim-tərbiyə işləri üzrə prorektoru, dosent Zülfüqar Musabəyov çıxışının sonunda təmsil etdiyi ali məktəbin qarşısında duran hədəflərdən söz açıb. Bildirib ki, əsas məqsəd yalnız Azərbaycanda deyil, həm də xaricdə tanınmış yüksək ixtisaslı karlar yetişdirməkdir. “Əminəm ki, sıx əməkdaşlıq universitetimizin yeni bir təhsil platformasına uğurla keçməsinə kömək edəcək” bildirən Z.Musabəyov forum iştirakçılarına uğurlar arzulayıb.

 

Qeyd edək ki, "Ali təhsil səviyyəsinin təminatı: dünya tendensiyaları və regional aspektlər" mövzusunda 5-ci Mərkəzi Asiya Beynəlxalq Forumu Mstəüil Akkreditasiya və Reytinq Agentliyinin (IAAR) 10 illiyinə həsr olunub.