Azərbaycan Tibb Universitetinin (ATU) rektoru, professor Gəray Gərabəyli Birgə Yardım Təşkilatının (UAFA) Azərbaycandakı direktoru Gven Börçellə görüşüb.

 

Aztibb.az xəbər verir ki, görüşdə professor Gəray Gəraybəyli qonağa Azərbaycanda yeganə tibb təhsili verən universitetin fəaliyyəti barədə ətraflı məlumat verib. Qeyd edib ki, 6 fakültəsi olan Tibb Universitetində ötən ildən etibarən tibb bacısı, kliniki psixologiya, fizoterapist, səhiyyə menecmenti kimi çox zəruri ixtisaslar əlavə edilib. Bununla yanaşı, tədris proqramına da ciddi dəyişikliklər edilir, daim yeniliklərə açıq olan ATU-da hazırda bir çox sahədə islahatlar aparılır. Beynəlxalq əməkdaşlıq layihələrinin əhəmiyyətini qeyd edən rektor UAFA təşkilatı ilə çoxistiqamətli əlaqələrin faydalı olacağını vurğulayıb.

 

Qven Börçell isə öz növbəsində UAFA-nın missiyası və onun uzunmüddətli məqsədi barədə məlumat verib. Təşkilatın 1998-ci ildə Azərbaycanda "uşaqlara, səhiyyəyə və təhsilə xüsusi diqqət ayırmaqla həyat səviyyəsinin uzunmüddətli inkişafına kömək etmək" missiyası ilə yaradıldığını bildirib. Qeyd edib ki, 23 il ərzində UAFA həm Azərbaycan daxilində, həm də beynəlxalq sosial siyasətdə uşaqlar, xüsusən də əlilliyi olan uşaqlar, sağlamlıq və təhsil məsələlərinə diqqət yetirən qurum kimi formalaşıb. 

 

Daha sonra tərəflər əməkdaşlıq perspektivlərini müzakirə ediblər.

 

Görüşdə UAFA-nın meneceri Ülviyyə Mirzəyeva, Corctaun Universitetinin Uşaqlara Dəstək Mərkəzinin direktoru, professor Tobi Long və ATU-nun beynəlxalq əlaqələr üzrə prorektoru, dosent Orxan İsayev də iştirak edib.