Azərbaycan Tibb Universitetinin (ATU) Tələbə Elmi Cəmiyyətinin təşkilatçılığı ilə Əməkdar elm xadimi, Dövlət mükafatı laureatı, professor Tamerlan Əziz oğlu Əliyevin 100 illiyinə həsr olunmuş tibb tələbələrinin və gənc alimlərin beynəlxalq konfransı keçirilib.

 

Onlayn formatda baş tutan tədbirdə Türkiyə, Özbəkistan, Almaniya, Belçikadan olan gənc alimlər, tələbələr, həkimlər, o cümlədən Azərbaycan Tibb Universitetinin və Naxçıvan Dövlət Universitetinin (NDU) müəllim və tələbələri iştirak ediblər.

 

Konfransı giriş sözü ilə açan ATU-nun Tələbə Elmi Cəmiyyətinin sədri, tibb elmləri doktoru Müşfiq Həsənov görkəmli alimin həyatı və elmi fəaliyyəti barədə məlumat verib.

 

Daha sonra ATU-nun elmi işlər üzrə prorektoru, dosent Rauf Bəylərov çıxış edib. Bildirib ki, Azərbaycan tibb elminin müasir istiqamətlərinin müəyyənləşdirilməsində, dünya səviyyəsinə çıxmasında, tibbi tədqiqatlardan dəyərli nəticələr əldə edilməsində Tamerlan Əliyevin əvəzsiz xidmətləri olub. Bu gün onun elmi məktəbinin yetirmələrinin adları nəinki ölkəmizdə, hətta ölkə hüdudlarından kənarda da böyük ehtiramla çəkilir.

 

Tədbirdə NDU-nun Tibb fakültəsinin dekanı Elsevər Əsədov, ATU-nun professoru Amaliya Əyubova, Türkiyə Yeditepe Universitetinin Ginekologiya kafedrasının müdiri, professor Erkut Ettar çıxış edərək professor T.Əliyevin keçdiyi şərəfli yoldan bəhs ediblər. Bildirilib ki, Tamerlan Əliyev olduqca mənalı bir insan, alim, həkim, pedaqoq ömrü yaşayıb, bütün həyatını Azərbaycan tibb elmi və səhiyyəsinin tərəqqisinə həsr edib, çox sayda elmi-tədqiqat işləri ilə elmimizə misilsiz töhfələr verib.

 

Qeyd olunub ki, alimin Azərbaycan tibb tarixi salnaməsinə qızıl hərflərlə yazılmış xidmətlərindən biri də bilavasitə onun təşəbbüskarlığı, təşkilatçılığı ilə inşa edilərək fəaliyyətə başlayan Səhiyyə Nazirliyinin akademik C.Abdullayev adına Elmi-Tədqiqat Kardiologiya İnstitutudur.

 

Sonra ATU-nun tələbə dekanı, TEC-in üzvü Fidan Həsənli və ATU-nun II Müalicə-profilaktika fakültəsi TEC-in sədri Fidan Bəylərova moderatorlar kimi konfransın işini idarə ediblər.

 

Tədbirdə müasir təbabətin aktual problemlərinə həsr olunmuş elmi məruzələr dinlənilib.

 

Almaniyadan Mehdi Əhmədpur, Cəlal Salatayi, Belçikadan professor Halid Topal, Özbəkistandan Sidiq Xocayevin təqdim etdiyi məruzələr iştirakçıların böyük marağına səbəb olub. 

 

Sonda çıxış edən M.Həsənov tədbirin iştirakçılarına və konfransın keçirilməsində yaratdığı şəraitə görə universitetin rektoru, professor Gəray Gəraybəyliyə təşəkkürünü bildirib.