Hər il sentyabrın 10-u İntiharların Qarşısının Alınması üzrə Beynəlxalq assosiasiyanın təşəbbüsü, Dünya Səhiyyə Təşkilatının dəstəyi ilə Ümumdünya İntiharların Qarşısının Alınmasının Günü qeyd edilir.

Aztibb.az Səhiyyə Nazirliyinin İctimai Səhiyyə və İslahatlar Mərkəzinə istinadən xəbər verir ki, bu günün qeyd olunmasında əsas məqsəd bütün dünyada intihar hallarının qarşısını almaq istiqamətində geniş maarifləndirmə aparmaqdır. Maarifləndirmə tədbirlərində bir daha vurğulanır ki, əhali arasında intihar və özünə qəsd əhval-ruhiyyəsinin profilaktikası üçün birgə səylər artırılmalı, ictimaiyyət arasında intihar əleyhinə geniş təbliğat aparılmalıdır.

İntiharların qarşısını almaq üçün, ilk növbədə, hər kəsin ətrafındakı insanlara, ailə üzvlərinə qarşı diqqətli olması, yaxınlarının davranışında depressiya, özünəqapanma kimi hallar müşahidə etdikdə onu mütəxəssisə yönləndirməsi vacibdir.

Statistikaya görə, orta hesabla, dünyada zorakı ölüm hadisələrinin yarısı intiharların payına düşür. İntihar hadisələrinin yayılması sahəsində inkişaf etmiş ölkələr liderlik edir. 

Ümumdünya Səhiyyə Təşkilatı və tərəfdaşları nəinki intiharın əleyhinədirlər, həm də özünə qəsdə cəhd edən adamların lazımi qaydada müalicə edilməsini və nəzarətdə saxlanmasını, həmçinin intihar hadisələrinin kütləvi-informasiya vasitələrində ehtiyatla işıqlandırılmasını vacib sayırlar.