İngiltərə və Uelsdə Milli Sağlamlıq Sistemi (NHS) rəsmiləri ildə iki dəfə qəbul ediləcək “İnclisiran” adlı dərmanın 10 il ərzində 30.000 insanın həyatını xilas edə biləcəyini söyləyirlər.
Aztibb.az xəbər verir ki, dərmana dair tövsiyəyə əsasən “İnclisiran” xolesterol əleyhinə istifadə edilən və ucuz olan “Statin” kimi dərmanlardan fərqli olaraq daha təsirlidir.
İngiltərənin nüfuzlu səhiyyə təşkilatı olan NICE “İnclisiran”ın insult və ya infarkt keçirmiş xəstələrdə, eləcə də xolesterolun səviyyəsini endirmək üçün tətbiq ediləcək müalicələrdə istifadə edilə biləcəyini bildirib. Mütəxəssislər bu dərmanın ürək-damar xəstələrinin həyatını təhdid edən riskləri azaltmağa kömək edəcəyini proqnozlaşdırırlar.
Qeyd edək ki, xolesterol bəzi qidalarda olan və qaraciyərdə istehsal olunan yağdır (lipid). Fərqli növlərə malik olan və bir çox hüceyrənin tərkibində olan bu maddə orqanizmin funksiyaları üçün əhəmiyyətlidir. Bununla yanaşı, “pis xolesterol” adlanan aşağı sıxlıqlı lipoproteinin (LDL) yüksək olması damarların tıxanmasına səbəb olur və ürək problemləri riskini artırır. Yağlı yeməklər, idman etməmək, artıq çəki, siqaret və spirt, həmçinin genetik faktor bu problemə səbəb olur.
Pəhriz və həyat tərzinin dəyişməsinə baxmayaraq, xolesterol səviyyəsini aşağı salmaq mümkün deyilsə, dərman qəbul etmək lazım gəlir. Xolesterolu azaltmaq üçün istifadə olunan digər dərmanlar qaraciyərdə xolesterol istehsalını yavaşlatsa da, “İnclisiran” daha fərqli təsir gücünə malikdir. Dərman qaraciyərdən zərərli xolesterolu çıxarmağa kömək edir. PCSK9 adlı genə təsir etməklə qaraciyərin qanda “pis” LDL xolesterolunu daha çox udmasına və parçalanmasına səbəb olur.
““İnclisiran” minlərlə insanın infarkt və insultdan ölməsinin qarşısını almaq üçün inqilab etmək potensialına malikdir”, – deyə NICE Sağlamlıq Texnologiyalarının Qiymətləndirilməsi Mərkəzinin direktoru Meindert Boysen bildirib.
“Ürək xəstəliyi hələ də ölümün əsas səbəblərindən biridir və təhlükəli yüksək xolesterol səviyyəsi olan insanlar üçün belə təsirli və faydalı bir müalicəyə sahib olmaq çox xoşdur”, – deyə NHS rəhbəri Amanda Pritçard qeyd edib və “İnclisiran”dan istifadənin yüz minlərlə insan həyatını xilas edəcəyini söyləyib.
