Azərbaycan Tibb Universitetinin (ATU) Beynəlxalq əlaqələr şöbəsinin müdiri, dosent Müşfiq Orucov Türkiyənin Malatya şəhərində işgüzar səfərdədir.

 

Aztibb.az xəbər verir ki, səfər zamanı o, İnönü Universitetinin rektoru, professor Ahmet Kızılayla görüşüb.

 

Görüşdə Müşfiq Orucov ATU-nun rektoru, professor Gəray Gəraybəylinin salamlarını çatdırıb, iki universitet arasındakı sıx əməkdaşlıqdan məmnunluğunu bildirib.

 

Rektor Ahmet Kızılay Türkiyə-Azərbaycan qardaşlığı, 44 günlük Vətən müharibəsi və şanlı ordumuzun möhtəşəm zəfərindən danışıb. Bildirib ki, Qarabağ zəfəri İnönü Universitetində də böyük sevinclə qarşılanıb və bu münasibətlə geniş ədəbi-bədii tədbir keçirilib.

 

Universitetlər arasındakı əlaqələrin vacibliyini qeyd edən rektor bu əməkdaşlığın daha da inkişaf etdirilməsinin perspektivlərindən bəhs edib.

 

Sonda qarşılıqlı hədiyyələr təqdim olunub, xatirə şəkli çəkilib. 

 

Görüşdə İnönü Universitetinin prorektoru, professor Nüsret Akpolat da iştirak edib.