Ümumdünya Hepatit Gününə həsr edilmiş “Birinci Bakı Beynəlxalq Hepatologiya və Qaraciyər Transplantasiyası Günləri” adlı beynəlxalq tədbir işini məruzələrlə davam etdirir.
Aztibb.az xəbər verir ki, 300-dən çox mütəxəssisin iştirak etdiyi tədbir "ZOOM" platforması üzərindən keçirilir.
Konfransın açılış mərasimində Dövlət Gömrük Komitəsi Tibbi Xidmət İdarəsinin rəisi, tibb xidməti general-mayoru Ceyhun Məmmədov, Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin rəisi, t.e.d. Rəşad Mahmudov, Hospitalın rəsmi tərəfdaşı olan “Florence Nightingale” Xəstəxanalar Qrupunun İdarə heyətinin sədri, dr. Sinan Nazif Aran, Mərkəzi Gömrük Hospitalının Cərrahiyyə və Orqan Transplantasiyası şöbəsinin rəisi, t.ü.f.d. Mircəlal Kazımi və digər tanınmış həkimlər iştirak ediblər.
Tədbir günün ikinci yarısında İstanbul Florence Nightingale Xəstəxanasının professoru İrfan Koruk və Mərkəzi Gömrük Hospitalın həkimi Aynur Səfiyevanın moderatorluğu ilə "Uşaq və böyüklərdə autoimmun və metabolik qaraciyər xəstəlikləri" paneli ilə davam edib.
Konfransda hepatitin törətdiyi fəsadlar, ona qarşı mübarizə yolları, hamiləlik və viral hepatitlər, COVID-19-un qaraciyərə təsiri, qaraciyər yağlanması və digər mövzularda müzakirələr aparılıb.
29 iyul tarixinədək davam edəcək konfransda ümumilikdə 24 məruzənin dinlənilməsi nəzərdə tutulur.
Qeyd edək ki, Mərkəzi Gömrük Hospitalının rəsmi Facebook səhifəsi üzərindən də canlı yayımlanan tədbir Azərbaycan Respublikası Səhiyyə Nazirliyinin "Davamlı Tibbi Təhsil üzrə elm və tədris tədbirlərinin akkreditasiya Qaydaları" əsasında akkreditasiya olunaraq 16 DTT balı qazanıb.
