"ZOOM" platforması üzərindən Ümumdünya Hepatit Gününə həsr edilmiş “Birinci Bakı Beynəlxalq Hepatologiya və Qaraciyər Transplantasiyası Günləri” adlı onlayn elmi tədbir keçirilir.

 

Aztibb.az xəbər verir ki, konfrans Dövlət Gömrük Komitəsi Tibbi Xidmət İdarəsi Elmi-Təcrübi və Tədris Mərkəzinin, Mərkəzi Gömrük Hospitalının və rəsmi tərəfdaş Florence Nightingale Xəstəxanalar Qrupunun birgə təşkilatçılığı ilə gerçəkləşib.

 

Tədbirdə hepatitin törətdiyi fəsadlar, ona qarşı mübarizə yolları, bu virusun yayılma səbəbləri, həmçinin müalicəsi barədə müzakirələr aparılır.

 

Elmi konfransda “Viral hepatitlər”, “Uşaq və böyüklərdə autoimmun və metabolik qaraciyər xəstəlikləri”, “Qaraciyər transplantasiyasına multidisiplinar yanaşma” mövzularında panel müzakirələr, eləcə də təcrübə mübadiləsinin təmin olunması üçün sual-cavab sessiyaları təşkil olunacaq. Ümumilikdə tədbirdə yerli və beynəlxalq mütəxəssislər tərəfindən 24 məruzə dinləniləcək.