Mərkəzi Klinikaya başqa bir xəstəxanadan 30-31 həftə hestasiya yaşında, 1500 qram çəki ilə, həyatının 3-cü sutkasında olduqca ağır vəziyyətdə olan yenidoğulmuş təxliyyə olunub.
Aztibb.az bu barədə Mərkəzi Klinikaya istinadən xəbər verir.
Klinikadan verilən məlumata görə, vaxtından əvvəl doğulmuş uşaq, erkən neonatal sepsis, pnevmoniya, poliorqan yetməzliyi - ürəyində hər iki mədəciyin ciddi konsentrik hipertrofiyası, kəskin böyrək çatışmazlığı, qaraciyər çatışmazlığı, bağırsaqların nekrotik enterokoliti diaqnozları ilə neonatal reanimasiyada təqribən 3 ay müddətində müalicə alıb.
Bildirilib ki, çox ağır günləri geridə qoyan və ciddi müalicələrdən keçən körpənin hazırda fiziki-psixi inkişafında, görməsi və eşitməsində heç bir problem yoxdur. Bu gün körpənin çəkisi artıq 4 kq-dır.
