COVID-19 virusunu uşaqlar hansı əlamətlərlə keçirirlər və hansı halda uşaqlar üçün daha təhlükəlidir?

COVID-19 pandemiyası zamanı aparılan müşahidələr göstərir ki, böyüklərlə müqayisədə uşaqlarda bu xəstəlik daha yüngül keçir. Müqayisə üçün söyləmək olar ki, uşaqlarda bu infeksiyadan baş verən fəsadlar və ölüm hadisələri böyüklərdən yüz dəfəyə qədər az rast gəlinir. Lakin onu da qeyd etmək lazımdır ki, bu vəziyyət uşaqlara göstərilən diqqət və qayğının azalmasına heç bir əsas vermir. Nadir hallarda da olsa, uşaqlarda çox ağır fəsadlar və ölüm hadisələri müşahidə edilir.

Bu xəstəlik uşaqlarda bir qayda olaraq hərarətin yüksəlməsi, baş ağrısı, boğaz ağrısı, qusma və ishalla müşayiət olunur. Onlarda böyüklərdə göründüyü kimi atipik pnevmoniyanın inkişafı nadir hallarda baş verir. Belə hallar müşahidə olunan uşaqlar vaxt itirmədən pediatra və ya uşaq infeksionistinə göstərilməlidir. Onu da yadda saxlamaq lazımdır ki, yüngül əlamətlərin görünməsinə baxmayaraq, uşaqlar ətrafdakılar üçün həmişə yoluxma təhlükəsi yaradırlar. Ona görə də uşaqlara qarşı daha da diqqətli olmaq lazımdır.

İlk növbədə, immun çatışmazlığı, şiş xəstəliyi, xronik xəstəliyi olan, inkişafdan geri qalmış uşaqlar üçün koronavirus infeksiyası daha böyük təhlükə törədir. Valideynlər və pediatrlar uşaqların düzgün və keyfiyyətli –vitaminlərlə zəngin meyvə-tərəvəzlər daxil olmaqla qidalandırılması, mövsümə uyğun geyindirilməsi, mümkün olan bütün hallarda açıq havada gəzdirilməsi və xəstəlik şübhəsi olanlarla təmasdan uzaq olmasına diqqət yetirməlidirlər.

Baş pediatr, professor Nəsib Quliyev

Aztibb.az