Ürək xəstəlikləri hər il dünyada milyonlarla insanın ölümünə səbəb olur. ABŞ Xəstəliklərə Nəzarət və Onların Qarşısının Alınması Mərkəzlərinin məlumatına görə, bu ölkədə hər 37 saniyədə bir insan ürək-damar xəstəliklərindən həyatını itirir.
Aztibb.az medimagazin.com.tr-ya istinadla xəbər verir ki, ABŞ-ın Miçiqan Ştat Universitetinin tədqiqatçıları dünyada ilk dəfə laboratoriyada bütün əsas ürək hüceyrə növlərinə, ürək kameraları və damar toxumalarına malik olan miniatür insan ürəyinin modelini hazırlayıblar.
"Mini ürəklər bu orqanla bağlı bütün problemləri dəqiqliklə öyrənmək üçün güclü modellər yaradır", - deyə universitetin biotibb mühəndisliyi üzrə professoru, işin həmmüəllifi Aitor Aquirre bildirib.
İnsan ürəyi orqanoidləri embrion və dölün inkişaf mühitini təqlid edən yeni bir kök hüceyrə sistemi sayəsində inkişaf etdirilib. Tədqiqatda tətbiq olunan biomühəndislik metodu sayəsində xəstələrdən götürülmüş pluripotent kök hüceyrələrin embrional ürəyin inkişafı kimi hərəkət etməsi təmin olunub.
Tədqiqatçılar növbəti mərhələlərdə yeni doğulmuşlarda ürək problemlərini öyrənmək üçün fetal ürək inkişafının təfərrüatlarına diqqət yetirməyi və insan ürək orqanoidini daha da təkmilləşdirməyi hədəfləyirlər.