14-16 iyul 2021-ci il tarixlərdə Parisdə Avropa kəllə-üz-çənə cərrahlarının XXV beynəlxalq konqresi onlayn formatda keçirilib.

Aztibb.az xəbər verir ki, tədbirdə bu sahənin ən qabaqcıl mütəxəssisləri, dünya şöhrətli alimləri və gənc tətdqiqatçıları çıxış ediblər. Forumun elmi proqramına xüsusi dəvətlə fəaliyyəti örnək ola bilən bəzi ölkə və ya qitəni təmsil edən Cəmiyyətlər dəvət olunub (Amerika, Böyük Britaniya, Asiya, eləcə də Çin, Avstraliya, Yaponiya, Cənubi Koreya və s.   Ağız və Üz-çənə cərrahları Çəmiyyətləri). 

İlk dəfə olaraq bu şərəfli siyahıya Azərbaycan Ağız və Üz-çənə cərrahları Cəmiyyəti (AzOMFS) daxil edilib. Dəvət məktubunda son zamanlar ölkəmizin bu sahədə çalışan mütəxəssislərinin nailiyyətləri, həmin Cəmiyyət tərəfindən yüksək səviyyədə keçirilən beynəlxalq tədbirlər və ölkəmizdə dövlət tərəfindən səhiyyəyə olan dəstək qeyd edilib.

Konfransda qonaq cəmiyyətlərə ayrılan xüsusi səhifədə AzOMFS-in sədri, professor Çingiz Rəhimov moderator qismində Cəmiyyətin fəal üzvlərini, öz maraqlı tədqiqatları ilə artıq beynəlxalq aləmdə tanınan mütəxəssisləri dəvətli məruzəçi simasında təqdim edib. 

Milli Onkologiya Mərkəzinin direktor müavini, Baş və boyun cərrahiyyəsi şöbəsinin müdiri, professor Əziz Əliyev, Azərbaycan Tibb Universitetinin kafedra müdiri, professor Eldar Qasımov, Azərbaycan Tibb Universitetinin əməkdaşı, dosent Nigar Sultanova, Azərbaycan Təkmilləşdirmə İnstitutunun əməkdaşı, dosent Cavid Əhmədbəyli, Xüsusi Müalicə Sağlamlıq Kompleksi və Caspian International Hospitalın əməkdaşı, uzman-həkim Aydın Talışinskiy, Azərbaycan Tibb Universitetinin əməkdaşı, dosent İsmayıl Fərzəliyev məruzələrlə çıxış ediblər.

Konfransda Azərbaycan Ağız və Üz-çənə cərrahları Cəmiyyətinin fəaliyyəti yüksək qiymətləndirilib.