İyulun 14-16-sında Fransanın paytaxtı Parisdə onlayn formatda Avropa Kəllə-üz-çənə cərrahlarının XXV Beynəlxalq Konqresi keçirilib.
Səhiyyə Nazirliyinin mətbuat xidmətindən verilən məlumata görə, tədbirdə ABŞ, Böyük Britaniya, Çin, Avstraliya, Yaponiya, Cənubi Koreya və s. ölkələrin Ağız və Üz-çənə cərrahları cəmiyyətlərinin ən qabaqcıl mütəxəssisləri, dünya şöhrətli alimləri və gənc tədqiqatçıları iştirak ediblər.
Avropa Kəllə-üz-çənə cərrahlarının konqresində Azərbaycan Ağız və Üz-çənə cərrahları Cəmiyyəti (AzOMFS) ilk dəfə iştirak edib.
Konfransda AzOMFS sədri professor Çingiz Rəhimovun moderatorluğu ilə keçirilən qonaq cəmiyyətlərə ayrılan xüsusi səhifədə Milli Onkologiya Mərkəzinin direktor müavini, professor Əziz Əliyevin, Azərbaycan Tibb Universitetinin (ATU) kafedra müdiri, professor Eldar Qasımovun, ATU-nun dosenti Nigar Sultanovanın, Ə.Əliyev adına Azərbaycan Dövlət Həkimləri Təkmilləşdirmə İnstitutunun dosenti Cavid Əhmədbəylinin və digərlərinin məruzələri dinlənilib.
Konfrans təşkilatçılarından daxil olan məlumata görə, Ağız və Üz-çənə cərrahları cəmiyyətlərinin arasında ən çox baxılan və yüksək qiymətləndirən AzOMFS üzvlərinin məruzələri sayılıb. Bu, Azərbaycan səhiyyəsinin böyük nailiyyətidir.