MEDICRIME Konvensiyası tibbi məhsulların saxtalaşdırılmasına və əhalinin sağlamlığına təhlükə yaradan oxşar cinayətlərə qarşı qanun sahəsində Avropa Şurası tərəfindən təsis edilən beynəlxalq hüquqi sənəddir. Konvensiyanın əsas məqsədi qanundankənar fəaliyyətin cinayət məsuliyyətinə cəlb edilməsilə əhalinin sağlamlığının qorunması, həmin fəaliyyətin qurbanlarının müdafiəsi üzrə əməkdaşlığın milli və beynəlxalq səviyyədə təşviqi, eyni zamanda profilaktik tədbirlərin həyata keçirilməsidir.

Aztibb.az xəbər verir ki, Konvensiya 2011-ci il oktyabrın 28-də imzalanıb və 2016-cı il yanvarın 1-dən qüvvəyə minib. 2016-cı ilin iyulundan başlayaraq konvensiya 24 ölkə tərəfindən imzalanıb və 9 ölkə tərəfindən təsdiq edilib.

Əczaçılıq sahəsində mühüm əhəmiyyət daşıyan bu konvensiyaya ölkəmizin qoşulması üçün də addımlar atılır. Belə ki, MEDICRIME Konvensiyası yeni növ koronavirus (COVID-19) pandemiyası dövründə saxta əczaçılıq məhsulları ilə əlaqədar cinayətlərə qarşı beynəlxalq mübarizə vasitəsi” mövzusunda keçirilən videokonfransda Analitik Ekspertiza Mərkəzinin mütəxəssisləri müşahidəçi qismində iştirak ediblər.

Avropa Şurasına üzv ölkələr də daxil olmaqla dünyanın bir sıra ölkələrinin və beynəlxalq təşkilatların 130-dan çox nümayəndəsinin iştirak etdiyi konfransda tibb və əczaçılıq məhsullarının saxtalaşdırılması ilə əlaqədar cinayətlərin araşdırılmasında MEDICRIME Konvensiyasının rolu və əhəmiyyəti, o cümlədən, əhalinin sağlamlığının qorunması məqsədilə qüvvədə olan cinayət qanunvericiliyindəki boşluqların aradan qaldırılması və icra mexanizminin təkmilləşdirilməsi üsulları müzakirə olunub.

Ölkəmizin MEDICRIME Konvensiyasını ratifikasiya etməsi gələcəkdə saxta əczaçılıq məhsulları ilə əlaqədar cinayətlərə qarşı mübarizədə mühüm mərhələnin bünövrəsini qoymuş olacaq.