Bakı Şəhər Gənclər və İdman Baş İdarəsi (BŞGİBİ), Nizami Rayon İcra Hakimiyyəti, Azərbaycan Əlil Arabasında Qılıncoynatma Federasiyası və Nizami Rayon Gənclər və İdman İdarəsinin birgə təşkilatçılığı ilə rayonda Vətən müharibəsi qazilərinin bir qrupu ilə görüşlər keçirilib.
BŞGİBİ-dən bildiriblər ki, görüşlər Vətən müharibəsi qaziləri Nurlan Nuriyevin, İlham İsmayılovun və Ramazan Muradovun yaşadığı evlərdə təşkil olunub.
Qazilərlə söhbətlərdə onlara mənəvi dəstək, hüquqi məsləhət, gənclərin paralimpiya hərəkatına cəlb olunmaları məsələləri müzakirə olunub. Onları maraqlandıran sualların müvafiq qurumlara çatdırılması üçün lazımi dəstəyin göstəriləcəyi qeyd edilib. Qazilərin Azərbaycanda keçirilməsi planlaşdırılan qılıncoynatma üzrə “Zəfər Kuboku”na cəlb edilmələri nəzərdə tutulub.
Diqqətə çatdırılıb ki, dövlətimiz şəhid ailələrinə, əlillərə, müharibə veteranlarına xüsusi diqqət və qayğı göstərir və vətəndaşlarımızın sosial müdafiəsi daim gücləndirilir.
Xatırladaq ki, Xəzər, Suraxanı, Sabunçu, Xətai, Binəqədi, Yasamal, Qaradağ, Nəsimi, Nərimanov rayonlarında Vətən müharibəsi qazilərinə psixoloji, mənəvi, hüquqi dəstək verilməsi üzrə görüşlər artıq təşkil olunub. Layihə respublikanın bütün ərazisini əhatə edəcək.
