İyulun 12-də Milli Məclisin Səhiyyə komitəsinin sədr müavini, millət vəkili Rəşad Mahmudov Azərbaycanda işgüzar səfərdə olan Türkiyənin Lokman Hekim Universitetinin nümayəndə heyəti ilə görüşüb.

 

Aztibb.az xəbər verir ki, görüşdə R.Mahmudov Azərbaycanla Türkiyə arasında gündən-günə inkişaf etməkdə olan çoxşaxəli əlaqələrdən söz açıb. O, son illər ölkəmizdə səhiyyənin inkişafı istiqamətində aparılan islahatlar, görülən işlər, əldə olunan nailiyyətlər, eləcə də Səhiyyə komitəsinin fəaliyyəti barədə məlumat verib.

 

Daha sonra nümayəndə heyətinin üzvləri Azərbaycana ilk dəfə gəldiklərini və səfərin məqsədinin iki ölkə arasında tibb və səhiyyə sahələrində əməkdaşlığın daha da genişləndirilməsi olduğunu vurğulayıblar.

 

Görüşdə nümayəndə heyətinin rəhbəri - Loğman Həkim Universitetinin rektoru, prof. dr. Bülənt Gümüşəl, universitetin İdarə Heyətinin sədri dr. Mehmet Altuğ, rektorun müşaviri, prof. dr. Ayşe Karaduman, universitetin Səhiyyə elmləri fakültəsinin və Tibb bacısı şöbəsinin müdiri, prof. dr. Fatma Öz, Əczaçılıq fakültəsinin dekanı, prof. dr. Belma Gümüşel, Azərbaycan Tibb Universitetinin prorektoru Orxan İsayev çıxış edərək, tibb sahəsində birgə inkişaf layihələri çərçivəsində gələcək fəaliyyətin istiqamətləri barədə fikirlərini bölüşüblər.