Ümumdünya Səhiyyə Təşkilatı (ÜST) müxtəlif vaksinlərin tətbiqinin təsirlərinin hələ tam öyrənilməməsi səbəbindən, eyni vaksinin iki dozası ilə koronavirusa qarşı peyvənd olunmağı tövsiyə edir. 

Aztibb.az xəbər verir ki, bu barədə ÜST-ün immunizasiya departamentinin rəhbəri Keyt O'Brayen tviterdə yayımlanan sual-cavab seansı zamanı bildirib.

O, bildirib ki, onlarda bununla bağlı yalnız bir məlumat var: ilk doza “AstraZeneca” İngiltərə-İsveç şirkətinin istehsalı olan peyvənd vurulduqdan sonra Amerikanın “Pfizer” şirkətindən vaksin dozası tətbiq edilib. Bu halda “qarışıq” immunizasiyanın mümkünlüyünə dair məlumatlar var.

“Lakin, bu haldan başqa, qarışıq vaksinasiya cədvəli haqda immun reaksiyasının davam edib-etməyəcəyi və istifadəsinin təhlükəsiz olub-olmadığı barədə hələ məlumatımız yoxdur”, - deyə o vurğulayıb. “Araşdırmalar davam edir, biz yaxın aylarda bu barədə məlumatları alacağımızı gözləyirik”, - deyə ÜST departamentinin rəhbəri davam edib. “Hazırda isə, biz hələ ki, iki dozanın tələb olunduğu hallarda, hər iki doza üçün eyni vaksindən istifadə edilməsini tövsiyə edirik”, - deyə o, qeyd edib.

Vaksinasiya olunan insanlarda koronavirusdan müdafiənin müddəti barədə suala O'Brayen birbaşa cavab verməyib və bu sahədə “araşdırmaların aparıldığını” qeyd edib. O, xatırladıb ki, COVID-19 əleyhinə vaksinlər yalnız bir il əvvəl hazırlanıb, buna görə də “monitorinq aparmaq və bundan əlavə anticisimlərin orqanizmdə qaldıqları müddəti öyrənmək üçün vaxt lazımdır”.