Hindistan və Çindən olan alimlər qrupu siçanlar üzərində apardıqları tədqiqatın gedişatında yağlı qidaların və çirkli havanın sağlamlığa neqativ təsirlərini müqayisə ediblər. Məlum olub ki, sağlam olmayan ekologiya 2-ci tip şəkərli diabetin inkişafı riskində yağlı qidaların istehlakı qədər əsas rol oynayan amillərdəndir. 

Aztibb.az medportal.ru-ya istinadla xəbər verir ki, “Journal of Clinical Investigation” jurnalında dərc edilmiş tədqiqat çərçivəsində alimlər laboratoriya siçanları qrupunu 24 həftə ərzində Yeni Dehlidə və ya Pekindəki havanı imitasiya edən mühitə yerləşdiriblər. Gəmiricilərin daha bir qrupu isə yüksək yağlı qida qəbul ediblər, lakin bu vaxt ərzində onlar ekoloji təmiz mühitdə olublar.

Yarım il sonra alimlər aşkar ediblər ki, çirkli havadan dəyən zərər yağlı pəhrizdən gələn zərərlə müqayisə edilə bilər – hər iki amil insulinə müqavimət və prediabet (gizli şəkər) üçün xarakterik olan qeyri-adi metabolizmə səbəb olub. Tədqiqatın müəllifləri qeyd edirlər ki, bu, epigenomdakı dəyişikliklərlə bağlıdır.

Mütəxəssislər bildirirlər ki, bununla belə, çirkli havanın səbəb olduğu dəyişikliklər bərpa edilə bilir: siçanlar ekoloji təmiz mühitə yerləşdirildikdə onlarda yaranan prediabet simptomları zəifləməyə başlayıb.