Bundan əvvəl hamilə qadınlara və hamiləlik planlaşdıranlara vaksinləmədən çəkinmək tövsiyə olunsa da, artıq Rusiya Federasiyasının Səhiyyə Nazirliyi hamilə qadınlara koronavirusa qarşı "Sputnik V" peyvəndi olunmağa icazə verib.

Aztibb.az medikforum.ru-ya istinadla xəbər verir ki, bu qərar barədə səhiyyə naziri Mixail Muraşko jurnalistlərə açıqlama verib. Onun sözlərinə görə, bu nəticəyə ekspertlər şurasının nümayəndələri gəliblər.

"Ekspertlər Şurası tərəfindən hamilələrdə "Sputnik V" peyvəndinin tətbiqinin əks göstəriş olması qərarının aradan qaldırılması haqqında qərar qəbul edilib. Beləliklə, infeksiyanın ağır gedişatı riskinə sahib hamilələrin vaksinləməsi imkanı yaradılıb", - deyə nazir bildirib.

Səhiyyə naziri qeyd edib ki, ekspertlər vaksinin tədqiqatlarının müsbət nəticələrinə əsasən bu qərara gəliblər.