Bakı şəhərinin Nəsimi rayonunda 26 iyun - Narkomanlığa və Narkobiznesə qarşı Beynəlxalq Mübarizə Günü ilə əlaqədar videokonfrans keçirilib.

 

Aztibb.az xəbər verir ki, tədbirdə Səhiyyə Nazirliyinin İctimai Səhiyyə və İslahatlar Mərkəzinin (İSİM), Narkomanlığa və narkotik vasitələrin qanunsuz dövrüyyəsinə qarşı mübarizə üzrə rayon komissiyasının, “Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası”nın işçi qrupunun Milli informasiya sektorunun, rayon Polis İdarəsinin, eləcə də rayon Gənclər və İdman İdarəsinin əməkdaşları, həmçinin rayon ərazisində fəaliyyət göstərən ali təhsil müəssələrinin tələbələri və tam orta məktəblərdə təhsil alan yuxarı sinif şagirdləri iştirak ediblər.

 

Konfransda Nəsimi rayon İcra Hakimiyyəti başçısının müavini, Narkomanlığa və narkotik vasitələrin qanunsuz dövriyyəsinə qarşı mübarizə üzrə rayon komissiyasnın sədri Zahid Xəlilov, Nəsimi rayon Polis İdarəsinin YYÇ-larla profilaktik iş bölməsinin əməkdaşı, polis kapitanı Yeganə Zeynalova, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının işçi qrupunun Milli informasiya sektorunun müdiri Raqif Allahverdiyev, “Qarabağ müharibəsi əlilləri, veteranları və şəhid ailələri” İctimai Birliyinin Nəsimi rayon şöbəsinin sədri Azər Quliyev, ”Məşədi Dadaş Zülfüqaroğlu məscidi” dini icmasının rəhbəri Şahin Həsənov, Nəsimi rayon Gənclər və İdman İdarəsinin rəisi Şahmar Tağıyev çıxış ediblər.

 

Onlayn konfransda sağlam nəslin formalaşması istiqamətində həyata keçirilən maarifləndirici tədbirlərin əhəmiyyəti vurğulanıb.

 

Həmçinin İSİM-in şöbə müdirinin müavini Ülkər Camalova geniş təqdimatla çıxış edərək, zərərli vərdişlərin və narkomaniyanın insan orqanizminə vurduğu zərərlərin acı fəsadları barədə ətraflı məlumat verib. O, iştirakçıları maraqlandıran çoxsaylı sualları cavablandırıb.