Azərbaycan Respublikasının Qida Təhlükəsizliyi Agentliyinin (AQTA) sədr müavini Rəşad Mafusovun rəhbərlik etdiyi nümayəndə heyəti Ukraynanın paytaxtı Kiyevə səfər edib.

 

Aztibb.az-ın məlumatına görə, səfər çərçivəsində Azərbaycan nümayəndə heyəti ilə Ukraynanın Qida Təhlükəsizliyi və İstehlakçıların Hüquqlarının Müdafiəsi Dövlət Xidmətinin rəhbəri Vladislava Maqaletskayanın başçılıq etdiyi nümayəndə heyəti arasında görüş keçirilib.

 

Görüşdə Vladislava Maqaletskaya Ukraynanın Azərbaycan ilə qida təhlükəsizliyi sahəsində əməkdaşlığı genişləndirmək niyyətində olduğunu bildirib. Qeyd edib ki, iki ölkə arasında illik idxal-ixrac əməliyyatlarının 120 milyon dollardan çoxu qida məhsullarının payına düşür. Həmçinin bu sahədə fəaliyyətin daha da genişləndirilməsinin mümkünlüyü diqqətə çatdırılıb.

 

Səmimi qəbula görə təşəkkürünü bildirən AQTA-nın sədr müavini Rəşad Mafusov bildirib ki, Azərbaycan qida təhlükəsizliyi sahəsində Ukrayna ilə əməkdaşlığın genişdirilməsində və hər iki ölkənin təcrübəsinin qarşılıqlı tətbiqində maraqlıdır.

 

Səfər çərçivəsində AQTA nümayəndə heyəti, həmçinin Ukraynanın Qida Təhlükəsizliyi və İstehlakçıların Hüquqlarının Müdafiəsi Dövlət Xidmətinə aid olan qurumlarının iş fəaliyyəti ilə tanış olub.