107 yaşlı Böyük Britaniya sakini Angela Hutor COVID-19-a qalib gəlmiş ən yaşlı ingilis hesab edilir. O, buna necə nail olduğu barədə danışıb.

Böyük Britaniyanın ən yaşlı sakini uzunömürlülüyünü və sağlamlığını qorumağa necə müvəffəq olduğunun sirlərini açıqlayıb. A.Hutor hər gün yüksək əhval-ruhiyyədə olduğunu və gündə bir ədəd portağal yediyini bildirib. O, 1918-ci ildə baş verən "İspan qripi" pandemiyasını, hər iki dünya müharibəsi görüb. COVID-19-a isə aprel ayında yoluxub. Hətta onun qızını anası ilə vidalaşmaq üçün reanimasiyaya dəvət ediblər.

Lakin Angelanın vəziyyətinin yaxşılaşmağa başlaması həkimlərin təəccübünə səbəb olub. Bir müddət sonra onu evə buraxıblar.

Angela immunitetinin güclü olmasını hər gün pozitiv əhval-ruhiyyədə olması və şirə şəklində deyil, dilimlər halında qəbul etdiyi təzə portağallarla izah edir.

A.Hutor "İspan qripi" epidemiyasını yada salaraq bildirir ki, o zaman hər şey adi görünürdü. İnsanlar işə getməyə davam edir, heç kəsi özünü təcrid etməyə məcbur etmirdilər. Cəmiyyət " İspan qripi" yoxmuş kimi həyatına davam edirdi.

O, vurğulayıb ki, ola bilər ki, məhz bu, qorxunc pandemiyanın öhdəsindən gəlməyə kömək edib.