Hindistanda Qanq çayından koronavirus infeksiyasından ölən altı nəfərin cəsədi çıxarılıb.

Aztibb.az xəbər verir ki, hadisə Uttar-Pradeş ştatında baş verib.

“Çaydan çürüməkdə olan altı cəsəd çıxarılıb. Həkimlər COVID-19 infeksiyasından ölənlərin cəsədləri ilə davranış prinsiplərinə uyğun olaraq krematoridə sonuncu ayinləri yerinə yetirib”, - deyə yerli məmur Pramod Ca telekanalın efirində bildirib.

Məmurun sözlərinə görə, cəsədlər güclü çürüməyə məruz qaldığı üçün onların şəxsiyyətini müəyyən etmək mümkün olmayıb.

Mayın əvvəlində Hindistanın Uttar-Pradeş və Bihar əyalətlərinin hakimiyyət orqanları Qanq çayında 100-dən çox cəsədin tapıldığı barədə məlumat yaymışdı. Onların koronavirus infeksiyası səbəbindən ölən insanların qalıqları olduğu ehtimal edilir. Polis hadisə ilə bağlı təhqiqata başlayıb.

Yerli əhalinin dediyinə görə, cəsədlərin Qanq çayına atılmasına ölkədə COVID-19 infeksiyasına rekord yoluxma göstəriciləri fonunda yüksək kremasiya xərcləri və dəfn tonqallarının özbaşına təşkili səbəb olub. Hakimiyyət orqanları cəsədlərin Qanq çayına atılmasını dərhal dayandırmağı tələb edib.

Qeyd edək ki, Hindistan koronavirusa yoluxma göstəricisinə görə dünyada ABŞ-dan sonra ikinci, ölüm hallarının sayına görə isə ABŞ və Braziliyadan sonra üçüncü yerdədir. Pandemiyanın statistikasını aparan Worldometer saytının məlumatına əsasən, indiyə qədər Hindistanda koronavirusa 28 milyon 175 mindən çox insan yoluxub, eyni zamanda, 25 milyon 947 min insan sağalıb, 331 min 909 nəfər isə infeksiya səbəbindən həyatını itirib.