Bu gün Azərbaycan Tibb Universitetinin (ATU) dosenti, Azərbaycan Patofizioloqlar Cəmiyyətinin üzvü, tibb üzrə fəlsəfə doktoru Sərdar Əliyevin 55 yaşı tamam olur.
Aztibb.az xəbər verir ki, Sərdar Əliyev 1989-cu ildə Azərbaycan Dövlət Tibb İnstitutunu bitirib, təyinatla institutun Mərkəzi Elmi Tədqiqat laboratoriyasında işə başlayıb. O, 1994-cü ildən ATU-nun Patoloji fizilogiya kafedrasında baş laborant, assistent, baş müəllim vəzifələrində çalışıb. Uğurlu elmi-praktiki fəaliyyəti ilə hər zaman diqqət mərkəzində olan alim hazırda universitetdə dosent kimi fəaliyyət göstərir.
O, 1994-cü ildə “Ürəyin limfa sisteminin drenaj funksiyası və miokardın qan təchizatının tənzimlənməsində onun rolu” mövzusunda namizədlik dissertasiyasını müdafiə edərək, tibb elmləri namizədi elmi dərəcəsini alıb.
Sərdar Əliyev 2-si dərs vəsaiti olmaqla, ümumilikdə 51 elmi işin müəllifidir.
Həm özünə, həm də başqalarına qarşı son dərəcə tələbkar olan alim bütün həyatı boyu tibb elmində yeniliklərin əldə edilməsinə, savadlı, yüksəkixtisaslı tibbi kadrların hazırlanmasına çalışıb. O, 2016-cı ildə ATU tələbələrinin rəyi ilə “İlin müəllimi” seçilib.
Tanınmış həkim Sərdar Əliyevi 55 illik yubileyi münasibətilə səmimi qəlbdən təbrik edir, ona Azərbaycan elminin inkişafı və tibbin tərəqqisi yolunda uğurlar arzu edirik!